भांगरभूंय | प्रतिनिधी
भांगरभूंय । प्रतिनिधी
वाळपयः सत्तरी तालुक्यांतल्या घसघश्यांची पर्यटनाचे नदरेन उदगरत करपा कडेन पर्येंची आमदार दिव्या राणे हिणे लक्ष घातले उपरांत सरकारी पांवड्यार ते दिकेश हालचाली सुरू जाल्यात. उत्तर गोंयची जिल्होधिकारी मामू हेगे हिणे संबंदीत अधिकाऱ्यां वांगडा हालींच ठाणे पंचायत वाठारांतल्या पाली हांगच्या पावसाळी घसघश्याची पळोवणी केली.
तांच्या वांगडा सत्तरी तालुक्याचो मामलेदार कौशीक देसाय, थळावे पंचायतीचो सचीव सर्वेश गांवकार आनी हेर अधिकारी आशिल्ले. घसघश्याच्या वाठाराचो आराखडो तयार करपा संबंदी तांणी चर्चा केली.
घसघश्याच्या सुवातांनी जंय शक्य आसा थंय बायोटॉयलेट आनी चेंचींग रूप बांदतले. पाली घसघश्या कडेन वचपाक रस्तो आनी हेर सुविधा उबारतले.
मजगतीं, ठाणे पंचायतींत कोयराचो विलो लावपा खातीर जमीन मेळना. एक सुवात आसा मात ती अजून पंचायतीच्या नांवार जाली ना. पंचायत सचीव सर्वेश गांवकार हांणी ही गजाल जिल्होधिकारी हागे हांच्या कानांर घातली आनी तिणे तातूंत लक्ष घालून जाता तितले बेगीन जमीन पंचायतीच्या नांवार करून दिवपाचें उतर दिलें. जमीन ताब्यांत येतकूच ठाणे पंचायत आपलो कोयर विलो प्रकल्प उबारतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
