भांगरभूंय | प्रतिनिधी
भांगरभूंय । प्रतिनिधी
काकोडा : समाज सेवा संघटना आराधना ग्रामीण वाचनालय, मालकर्णे हांगा आयोजीत केल्ल्या स्वातंत्र्य दिसाच्या कार्यावळींत मुखेल सोयरो म्हूण उलयतना राज्य शिक्षक पुरस्कार मेळियल्या शिक्षक विजयकुमार कोप्रे हांणी पालकांनी आपल्या घरांत वाचनाची संस्कृताय निर्माण केल्यार भुरग्यांक एक वाचनाची सवय लागतली आनी भुरग्यांच्या शिक्षणीक प्रगतींत तांका मजत जातलीं अशें मत उक्तायलें. दरेक पालकान पुस्तकां आनी दिसाळें विकतें घेतल्यार फुडलें पिळगेक ताचो फायदो जातलों हातूंत दुबाव ना. आयज आमी भारताच्या स्वातंत्र्य दिसाचें अमृत महोत्सव 75 वर्सां मनयतात. देशाच्या स्वातंत्र्याचो इतिहास आनी खास करून गोमंतकाचे सुटकेचो इतिहास भुरग्यांमेरेन पावपाक जाय. आपल्या इतिहासाक मोल दिना अशा देशाची वा प्रांताची प्रगती म्हत्वाची न्हय अशें कोप्रे हांणी फुडें सांगलें.
मळकर्णे प्राथमीक शाळेची मुख्याध्यापिका ज्योस्ना प्रभुगांवकार, सेवा निवृत्त मुख्याध्यापक रमेश दाभोलकार, संघटनेचे अध्यक्ष श्रीपाद सामंत, किरण गांवकार हे माचयेर मानाचे सोयरे म्हूण हाजीर आशिल्लें.
पालकांनी आपल्या भुरग्यांक शाळेच्या गिन्याना वांगडाच तांच्या एकंदर बऱ्यापणा खातीर खेळ आनी हेर मळार वांटो घेवपाक आदार दिवचें. कोप्रे हांणी आमच्या देशांतल्या स्वातंत्र्य नायकांची भुरग्यांक वळख करून दिवपाचें आवाहन केलें. त्या भुरग्या कडेन खाशेल्या शैलीन संवाद सादतना कोप्रेन गितां आनी प्रस्नां वरवीं स्वातंत्र्याचें म्हत्व पटयलें.
ह्या संदर्भार रमेश दाभोलकारान आपले विचार मांडले. श्रीपाद सामंत हांणी हाजीर आशिल्ल्यांक येवकार दिलो जाल्यार किरण गांवकार हांणी कार्यावळींचे सूत्रसंचालन केलें. हे निमतान वेशभूषा, चित्रकला, निबंद आनी भाशण सर्ती घडोवन हाडल्यो. विजेत्यांक मानेस्तांच्या हस्तुकी इनामां दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
