भांगरभूंय | प्रतिनिधी
घुंवळे वखदांचेर नियंत्रण दवरपा खातीर उपाय येवजण
पणजी : नव्या वर्साच्या फाटभुंयेर गोंयांत पार्ट्यो जावपाक सुरवात जाल्या. वागातोर जावपी सनबर्न महोत्सव हें नव्या वर्साचें आकर्शण आसतलें. पार्ट्यांनी घुंवळे वखदांचेर नियंत्रण दवरपा खातीर पुलिसांनी खासा पंगड स्थापन केल्यात. हे पंगड पार्ट्यांचेर नदर दवरतले. घुंवळे वखदांचेर नियंत्रण दवरपा खातीर खासा पंगड पार्ट्यांनी आचकीत भेट दितले अशी म्हायती गुन्यांव फांट्याचे पुलीस अधिक्षक निधीन वाल्सन हांणी दिली.
वागोतार हांगा फाल्या सावन सनबर्न महोत्सव सुरू जाता. तीन दीस हो महोत्सव चलतलो. ते भायर दर्यादेगो तशेंच हेर हॉटेलांनी पार्ट्यो तशेंच हेर महोत्सव जातले. ह्या महोत्सवांनी तशेंच पार्ट्यांनी घुंवळे वखदांचो वापर जाता अशी चर्चा आसा. बऱ्याच वर्सां पयली सनबर्न महोत्सवांत घुंवळे वखदांच्या अती सेवनाक लागून एके बायलेक मरण आयिल्लें. हाका लागून गोंयची बरीच बदनामी जाल्ली.
कांय दिसां पयलीं सोनाली फोगाट हिका लेगीत घुंवळे वखदांच्या सेवना उपरांत मरण आयिल्लें. ह्या प्रकरणांत सीबीआयन तपास करून आरोपपत्र दाखल केलां.
घुंवळे वखदांच्या वापराचेर कायद्यान बंदी आसा. घुंवळे वखदांचो वापर दिसलो जाल्यार कायद्या प्रमाण कारवाय जातली. घुंवळे वखदां विरोधी पंगड स्थापन केला. पंगडांनी पळोवणी सुरू केल्या, अशें वाल्सन हांणी सांगलें.
विदेशांत कोविडाचे दुयेंती वाडत आसात. हाका लागून जतनाय घेवपाची सुचोवणी केंद्र सरकारान केल्या. नातलां आनी नव्या वर्साक लागून गोंयांत आजून निर्बंध लागू करूंक नात. केंद्रीय भलायकी मंत्रालयान जीं मार्गदर्शक तत्वां जारी केल्यांत ताची कारवाय जातली अशें निधीन वाल्सन हांणी सांगलें.
नातलाचे परबेक लागून खूबशे विदेशी पर्यटक गोंयांत आयल्यात. आतां नव्या वर्साक लागून पर्यटक येवपाक लागल्यात. हाका लागून पर्यटकांचो आंकडो बरोच वाडला. पर्यटकां सयत सेलिब्रेटी तशेंच महनीय व्यक्ती गोंयांत येवपाक सुरवात जाल्या. बॉलीवूड स्टार अक्षय कुमार हो सध्या गोंयांत आसा. दर्यादेग वाठारांनी जावपी पार्ट्यो आनी पर्यटकांक लागून वाहनांचो आंकडो वाडला. वाहनांचो आंकडो वाडपाक लागिल्ल्यान येरादारीची कोंयडी जावपाक सुरवात जाल्या. सोमारा कुठ्ठाळे येरादारीची कोंयडी जाली. पणजी, कळंगूट, मिरामार, कोलवें तशेंच जंक्शनांचेर पुलिसांक तैनात केल्यात. येरादारी पुलीस आनी थळावे पुलीस हे जोड पालवान येरादारीचें वेवस्थापन करतले अशें निधीन वाल्सन हांणी सांगलें.
नव्या वर्साचे फाटभुंयेर अपघातांची भिरांत आसता. हाचे पयली निमाण्या दिसा आनी नव्या वर्साच्या पयल्या दिसा खूबशे अपघात जाल्यात. हे फाटभुंयेर येरादारी पुलिसांनी येरादारीचे वेवस्थापन सुरू केलां. परवानो नाशिल्ल्या तरणाट्यां आड पुलिसांनी कारवायेची मोहीम सुरू केल्या.
सनबर्न महोत्सवांत 30 हजार लोकांचे उपस्थितीचो अदमास आसा. महोत्सवांत गोवन व्हिलेज हो खासा फांटो आसतलो. हाका लागून अंदूंच्या सनबर्नाक चड गर्दी जावपाची आस्त आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
