भांगरभूंय | प्रतिनिधी
भांगरभूंय । प्रतिनिधी
केंपेंः मड्डी- तिळामळ येथील लोकवस्तींत वचपी पारंपरीक रस्तो आडोवपी इमारत बांदकामाक परवानो दिल्ले खातीर थळाव्या तिडकल्ल्या सुमार शंबर लोकांनी शेल्डें पंचायत कार्यालयांत वचून पंचायत मंडळाक जाब विचारली. वाट कशीच आडावपाक दिवचे नात अशें तांणी सागलां. मड्डेर हांका सुमार 80 घरां आसात. थंयचे लोक हो रस्तो वापरतात.
मड्डी हांगा वचपाक पयलीं दोन रस्ते आशिल्ले. एके इमारतीक लागून एक रस्तो बंद जाल्लो. दुसरोय रस्तो नवे इमारतीक लागून बंद जावपाचो आसा. ही इमारत बांदपाक पंचायत मंडळान परवानो दिल्लो तेन्ना थळाव्या लोकांनी ताका विरोध करतकूच नगर नियोजन मंडळ आनी हेर संबंदीत खात्यांनी पळोवणी करून परवानो स्थगीत केल्लो. मात फाटल्या 13 ऑक्टोबराक जाल्ले पंचायत मंडळाचे बसकेंत इमारत बांदकामाक संमती दिल्ली. ताका लागून लोक परत एकठांय येवून तांणी हो परवानो रद्द करपाची मागणी केल्या. रॅली घेवन शेल्डें पंचायत कार्यालया कडेन आयिल्ला लोकां वांगडा थळावो पंच वांगडी कायतना कार्व्होलो आशिल्लो.
मड्डी हांगा चडशे एसटी समाजाचे लोक रावतात. आपल्या वॉर्ड 5त बांदकाम परवानो दिल्ले इमारतीच्या प्लॅनात जायत्यो तंत्रिक चुको आसात. वाड्यार वचपी रस्तो हे इमारतीचो रस्तो अशें दाखयलां. ताका लागून पारंपरीक रस्तो बंद जातलो अशें पंचायत मंडळाचे बसकेंत हांवे दाखोवन दिल्लें. मात ताचे कडेन आडनदर करून बांदकाम करपाक मंजूरी दिवपाचो निर्णय घेतलो अशें पंच कार्व्हालो हांणी सांगलें. म्हायती हक्क कायद्या खाला म्हायती मागल्यार पंचायत सेक्रेटरी ती दिना अशें रॉनी ऑलिव्हेरा हांणे सांगलें.
हे विशीं सरपंच दीप्ती नायक हिका विचारलें तेन्ना कोणाचेरूय अन्याय जावचो ना हाची जतनाय घेतले. जें कायदेशीर आसा तेंच करतले अशें तिणे सांगलें. ऑलिव्हेरा हांणी मागिल्ली म्हायती ताका दितले अशें सेक्रेटरीन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
