भांगरभूंय | प्रतिनिधी
मडगांव : पाडी-बार्श्यां बुधवारा रातीं बसीन धपको दिल्ल्यान दोगां तरणाट्यांक मरण आयलें. गंभीर जखमी दिलीप वेळीप (३८) आनी संदेश गांवकार (२७) अशीं मरण आयिल्ल्यांचीं नांवां. हे विशीं कुंकळ्ळी पुलिसांनी बसचालकाक ताब्यांत घेवन अटक केली. तशेंच बसूय जप्त केल्या.
कुंकळ्ळी पुलीस स्टेशनाचे हद्दींतल्या पाडी बार्शेंच्या एका वोल्ताचेर हो अपघात जालो. दिलीप वेळीप आनी संदेश गांवकार हे दोग जाण कामाचेर वतना वोल्ताचेर बसीवेलें नियंत्रण गेल्ल्यान तिणें दुचाकीक धपको दिलो. हातूंत दिलीप आनी संदेश ह्या दोगांकूय गंभीर दुखापती जाल्यो. अपघाता उपरांत खाजगी बसचालकान घडणुके सुवातेवेल्यान पळ काडली. जखमींक बाळ्ळी च्या भलायकी केंद्रांत व्हेलीं. मात थंय तांकां मरण आयिल्ल्याचें सांगलें. कुंकळ्ळी पुलिसांनी हे घडणुकेचो पंचनामो केलो. घडणुके सुवातेवेल्यान पळून गेल्ल्या बसचालका वांगडा बसूय कुंकळ्ळी पुलिसांनी ताब्यांत घेतली. उपरांत बसचालकाचेर गुन्यांव नोंद करून ताका अटक केली.
पाडीच्या ह्या वोल्ताचेर आतां मेरेन जायते अपघात जाल्यात. सुमार २० लोकांनी ह्या रस्त्याचेर आपलो जीव वगडायला. महामार्गाचें काम जातलें अशें जाहीर करतात, मात तो मेरेन कितेंय उपाय करपाची गरज आसा. राज्य सरकारान अपघात जावपी वोल्तांवेलो रस्तो रुंद करपाची मागणी थळावे नागरी प्रशांत नायक हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
