भांगरभूंय | प्रतिनिधी
पाकिस्तानान हांगाच्या गद्दाफी स्टेडियमाचेर जाल्ले आशियायी करंड सर्तीचे सुपर चारांतले पयले मॅचींत बांगलादेशाक 7 विकेटींनी हारयलो. ह्या जैतान पाकिस्तानान दोन गूण घेवन गुणतकट्यांतली पयली सुवात मेळयली.
बांगलादेशान टॉस जिखून पयलीं बॅटींग करपाचो निर्णय घेतलो. पूण, ताची सुरवात बरी जाली ना. मेहदी हसन मिराज शुन्याचेर, मोहम्मद नईम 20 आनी लिटन दास 16 धांवड्यो करून बाद जालो. तोहिद लेगीत फकत दोन धांवड्यो करून बाद जालो. पूण, मुखेली शाहिक अल हसनान मुश्फिकूर रहीमा वांगडा मेळून डाव सांबाळपाचो यत्न केलो. दोगांयनी मेळून स्कोर 147 मेरेन पावयलो. मुखेली शाकिब अल हसनान 57 बॉलांनी 53 धांवड्यो केल्यो. हातूंत सात चवक्यांचो आस्पाव आशिल्लो. ताचे खेरीत मुश्फिकूर रहीमान 87 बॉलांनी 64 धांवड्यांचें योगदान दिलें. ताणें पांच चवके मारले. ह्या दोगां खेरीत बांगलादेशाच्या एकाय बॅट्समनाक व्हड खेळी करपाक जमली ना. आनी अशे तेरेन ताचो डाव 38.4 ओव्हरींनी 193 धांवड्यांचेर सोंपलो. ताणें आपल्यो निमाण्यो पांच विकेटी फकत 19 धांवड्यांनी वगडायल्यो. पाकिस्ताना वतीन हॅरीस राउफ आनी नसीम शाह हाणें वळेरेन चार आनी तीन विकेटी घेतल्यो.
मोखीचो फाटलाव करपी पाकिस्तानाक सादूरतायेन सुरवात केली. फखर जमांन 31 बॉलांनी 20 आनी मुखेली बाबर आजमान 17 धांवड्यो केल्यो. ते उपरांत इमाम उल हक आनी मोहम्मद रिजवान हाणें सोंपें जैत मेळोवन दिलें. इमाम उल हकान 78 आनी रिजवानान नाबाद 63 धांवड्यांची खेळी केली.
बांगलादेशाक नजमूल हुसैन शान्तोची गैरहाजेरी जाणावली. सर्तींत बांगलादेशा वतीन ताणें सगल्यांत चड धांवड्यो केल्ल्यो. हॅमस्ट्रिंग इंज्युरीक लागून तो हे मॅचींत खेळूंक ना. बॅट्समनां सयत बॉलर लेगीत अपेशी थारले. फिल्डींग लेगीत सुमाराची थारली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
