भांगरभूंय | प्रतिनिधी
पणजी : गणपती बाप्पा मोरया, फुडल्या वर्सा बेगीन येयात, मंगलमुर्ती मोरया…असो गजर करीत गोंयकारांनी पांच दिसांचे गणपतीक निरोप दिलो. पांच दिसांचे गणपती पावयिल्ले आसले तरी गणपतीची उमेद कायम आसा.
गोंयांत बुधवारा चवथ सुरू जाली. देड दिसांच्या गणपतींचे बिरेस्तारा विसर्जन जालें. हाचे उपरांत आयतारा पांच दिसांच्या गणपतींचें विसर्जन जालें. आयतारा सुटी आशिल्ल्यान सगल्यांक गणपती विसर्जनाचो आनंद घेवप शक्य जालें. चडशा जाणांचे गणपती देड आनी पांच दिसांचें आसतात. हाका लागून घरची चवथ आतां सोंपल्या. कांय जाण सात दीस, कांय जाण णव दीस गणपती पुजतात. हाका लागून कांय जाणांची चवथ उरल्या. काल रातीं सगल्याक गर्दी आशिल्ली. रातीं सात ते रातीं बारा मेरेन विसर्जन सुरू आसलें. फोग मारपाचे प्रमाण उणें जाल्लें आसलें तरी कांय जाणांनी विसर्जना वेळार माराण मारपाची उमेद भागयली. कांय कडेन संगिताच्या तालार गणपतीचें विसर्जन जाले. भौशीक गणपती अजून आसात. हाका लागून चवथीचें वातावरण कायम आसा. पणजे, म्हापशें, दिवचल, सांखळे, फोंडें, मडगांव, वास्को, वाळपय, सांवड्डें ह्या सगल्या शारांनी भौशीक गणपती आसात. देखावे आनी सांस्कृतीक कार्यावळी ही भौशीक गणपतीची खाशेलेपणा आसात. अनंत चतुर्दशी दिसा भौशीक गणपतींचें विसर्जन जातलें. चवथीक लागून बाजारांत गर्दी जाताली. येरादारीचे प्रमाण लेगीत चड आशिल्लें. सोबितीकरणाच्या सामानांनी बाजाराक वेगळोच रंग आयिल्लो.
फाटलीं दोन वर्सा कोरोना म्हामारीचें सांवट आशिल्लें. हाका लागून चवथीच्या उमेदीचेर मर्यादा आशिल्ल्यो. अंदूं मात वेगळेच वातावरण आशिल्लें. गणेशोत्सवाची एसओपी वा निर्बंध नाशिल्ले. हाका लागून गणपती हाडपा सयत ते पावोपाक लेगीत लोकांनी गर्दी केली. चवथी पयली बाजारांनी तर वेगळोच साज आयिल्लो. फुलां, हार, फोग, फळां, सजावटीचे सामान, तोरण, माटोळीचे सामान हाका लागून बाजारांत वेगळेंच वातावरण तयार जाल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
