भांगरभूंय | प्रतिनिधी
कोरोनाक लागून भौसाच्यो, गर्दीच्यो कार्यावळी सामक्यो बंद जाल्यो. पूण, आतां ल्हवू ल्हवू सगलें जाग्यार पडटा. व्याख्यानां म्हणू नाकात, भासाभाशेच्यो कार्यावळी म्हणू नाकात, आतां लोक आपल्या करियराचो विचार करूंक लागल्यात. ह्या सगल्यांक आतां एक व्हड संद मेळटली, ती सेरेंडिपिटी महोत्सवा निमतान. कोरोना पयलीं हो महोत्सव दबाज्यान जातालो आनी जायत्या कलामोगींक जायत्यो गजाली पळोवपाक मेळटाल्यो तशेंच समीक्षक, तज्ञ हांची भासाभास आयकूंक मेळटाली. आतां व्हड तेंपान हो महोत्सव पणजी आनी लागींच्या वेंचिक सुवातींचेर जावपाचो आसा. अशा महोत्सवान नाटक, सिनेमा, शिल्प, नाच, कुकिंग सारक्या विशयांचेर देशांतले नामनेचे कलाकार प्रदर्शन, कला सादर करतात. तत्वांचो सोद घेत नवे नजरेन आपल्यो कलाकृती लोकां सामकार हाडपाचो यत्न करतात. वेगळो विचार, वेगळी नजर आसपी कलाकारांक ही एक व्हड संद, जिचो लाव आमी घेवपाक जाय.
ह्या महोत्सवाचें आयोजन दिल्लींतले आयोजक करतात. आपसेवक लेगीत तांचेच आसतात. हांचेर टिका करचे परस असो उत्सव आमी कित्याक करूं शकले नात, हे नदरेन लेगीत पळोवपाक जाय. घडये ताका व्हड रूप आमी दिवंक शकचे नात, पूण ल्हान पांवड्याचेर आमी हांचें आयोजन करूं शकतात. हे खातीर थळाव्या कलाकारांक थळाव्या विशयांचेर विचार करपाक संद मेळूं शकता. असो महोत्सव गोंयांत जाता, हाचे एक कारण म्हळ्यार हांगां कलेची कदर करपी, कलाकारांक, कलेक मान दिवपी रसिक आसात. नव्या विचारांक हांगाचे रसिक येवकार दितात. नाटकां, तियात्रां, फॅशन, अध्यात्म…. विंगड विंगड गॅलरींतल्यान थळाव्या कलाकारांचो आविश्कार जायत आसता, पूण सेरेंडिपिटी सारक्या प्रदर्शनांत देशभरांतले कलाकार एकठांय येतात. खेरीज गोंय हें आतां आंतरराष्ट्रीय सुवात जाल्ल्या कारणान थळाव्या तशेंच देश- विदेशांतले रसिक हांगां येवंक शकतात.
एका महोत्सवांत म्हान गोंयकार चित्रकार फ्रांसिस्क न्यूटन सोजा हांचे नातू सोलोमन हाणें गोंयांतल्या कांय इमारतींच्या वण्टींचेर व्हडलीं चित्रां काडिल्लीं. जाची सगल्यांनीच तुस्त केली. ताका थळाव्या कलाकारांनीय वांगड केलो. हातूंतल्यान थळाव्या कलाकारांक असो महोत्सव जशी संद दिता तशी रसिकांक लेगीत आस्वाद घेवपाची संद मेळटा. जायरात करीनासतना गोंयांत लाखांनी लोक येतात. ताचो लाव घेवन सेरेंडिपिटी महोत्सव हांगां जाता. जसो मनरिजवण संस्थेचो इफ्फी चित्रपट महोत्सव, कला संस्कृतीचो कोसंबी महोत्सव गोंयांन लोकप्रिय केला, तसो सेरेंडिपिटी महोत्सव रसिकां भितर सृजनशील कलाकारां भितर लोकप्रीय जायत गेला, हें आमी न्हयकारूंक शकनात.
संवसारांतल्यो बऱ्योच घडणुको ह्यो योगायोगान आमच्या हाताक लागल्यात. ह्या महोत्सवाच्या निमतान थळाव्या रसिकांचो, करियर करपी उमेदवारांचो लेगीत आपल्या विचार, कृतींतल्यान भाग्योदय घडोवपी गजाली निर्माण जावच्यो. बरेच फावट एखादी घडणुको घडटकच नाजाल्यार कितेंय पळयतच आमकां सुचता. देखीक गुरुत्वाकर्षणाचो सोद अपघातीच न्यूटनाक लागलो. आपोल तकलेर पडिल्ल्याचें निमित्त जाले. अशी जायतीं फळां त्या वेळार लोकांचेर पडलीं आसतलीं, पूण तीं सकयल कित्याक पडटा, हाचो विचार फक्त न्यूटन करूंक शकलो आनी ताका गुरुत्वाकर्षणाचो सोद लागलो. खंयच्या महोत्सवांत लेगीत अशें विचारचक्र सुरु जावं शकता. म्हूण आमी अशे महोत्सव चुकोवंक फावना. तुमकां घडये तुमचे शिक्षक नाजाल्यार शाळा थंय व्हरपाक फाटी फुडें करूं शकता, तेन्ना तुमी तुमच्या आई- बाबाक नाजाल्यार लागींच्यांक घेवन ह्या महोत्सवाक भेट दियात. अशें म्हणटात, की 1754 सालांत हो सेरेंडिपिटी शब्द मनशाक मेळ्ळो. हॅरिस वोलपोल हांणी आपल्या इश्टाक एक चीट बरयली. तातूंत ह्या उतराचो ताणें उपेग केलो. 2004 त अणकार करपी एके ब्रिटिश संस्थेन 10 अडचणींत हाडपी शब्द उजवाडायले. तातूंतलो एक शब्द म्हळ्यार सेरेंडिपिटी!
ह्या महोत्सवांत तुमकां देश- विदेशांतले नामनेचे कलाकार, समीक्षक, जाणकार हांचे दर्शन जातलें. तांचे विचार आयकुपाची संद मेळटली. गोंयची आदली विधानसभा, गोंय मनरीजवण संस्था सारक्या सुवातांचेर ह्या महोत्सवाची विंगड- विंगड प्रदर्शनां जातलीं. ताची म्हायती तुमका दिसाळ्यांनी वाचूंक मेळटली. 15 ते 23 डिसेंबर मेरेन हो गोंयांतलो पांचवो महोत्सव जावपाचो
आसा.
प्रा. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
