पहलगाम हल्ल्याच्या निमतान…

भांगरभूंय | प्रतिनिधी

चीनाच्या दबावाखाला इराण आनी अफगाणिस्तानान आमचे तांच्या देशांतले प्रकल्प भायरायल्यात. आयज ते देश चीनच्या उतरा भायर वच्चे नात.

सुरक्षिततेंल्या गाफीलपणाचें मोल सैनिक, नागरिकांचो जीव वगडावन चुकोवचें पडटा. 1993 च्या मुंबय धमाक्यांत 257, 2006 च्या मुंबय रेल्वे स्फोटांत 187, 2008 च्या मुंबय हल्ल्यांत 165 आनी आता पहलगामांत 26 नागरिक सोंपले. पठाणकोट हल्ल्यांत 12, उरींत 19 आनी पुलवामांत 40 सैनिक सोंपले.
पठाणकोट वायुदळ अतिसुरक्षा भागांत लायटी नादुरूस्त जाल्ले कारणान काळोखाचो फायदो घेत 2 जानेर 2016 फांतोडेर युनायटेड जिहाद कौंसिलाचे 4 आतंकवादी घुसले. उरी कँपांत सुरक्षाकर्मी शिफ्ट बदलतना व्यस्त आशिल्ले, प्रवेशद्वाचेर लक्ष दिलेना, ताचो फायदो घेत 18 सप्टेंबर 2016 दिसा जैश- ए-मोहम्मदचे आतंकवादी भीतर सरिल्ले. 14 फेब्रेर 2019 दिसा सैनिकांक विमानान व्हरपाचे सोडून पुलवामाच्या संवेदनशील भागांतल्यान रस्त्यान लग्नाची वरात व्हरतात तशे तांकां व्हेले. प्रवासांत सैनिकांनी भायर कितें घडटा ताचेर लक्ष दिलेंना. आत्मघातकी बाँब स्फोटान घात केलो. मुंबय 2008 हल्ल्यांआदी हल्लेखोर आनी पाकिस्तानी आतंकवादी सुत्रधारां वांगडा जाल्ले संवाद अमेरिकी सीआयए गुप्तहेरांनी आयकल्ले आनी ताचे विशीं अमेरिकेन आमच्या सरकाराक सादूर केल्लें, पूण आमी मनार घेतलें ना.
अनुच्छेद 370 निरस्त केले उपरांत “हमने काश्मिरमें आतंकवाद खत्म किया” म्हणत सरकार प्रशासन सुस्त दिसलें. योग्य सुरक्षे अभावी 15 दीस फाटीं पहलगामांत 26 जणांक आपलो जीव वगडावचो पडलो. भोवंडेकारांक हडीथांतली कलमा वाचपाक लायत, तांच्यो मुलाखती घेत लश्कर ए तायबाचे प्रशिक्षित आतंकवादी सुशेगाद मनजोगतो रक्तखेव करून थंयच्यान पसार जाले. धा वर्स फांटी हांव श्रीनगर सावन अनंतनाग वतना वाटेर सगळे कडेन रस्त्याच्या दुतर्फा सशस्त्र सैनिक गस्त घालताले. बिजबेहारा गांवा लागी रस्त्याचे कुशीक एका आतंकवाद्याच्या कुडी वांगडा एम्ब्युलन्सची वाट पळयत सैनिक उबे दिसले. 22 तारखेर हल्ल्यांत सामिल जाल्ल्या आतंकवाद्याचे घर बुलडोजरान मातयेभरवण केलें ते ह्याच बिजबेहारा भागांत. इतलें आसतना पहलगामांतल्या हिंसा घडल्या बैसरन सुवातीर एक सादो पुलीस तेन्नाय दिसलो ना. पर्यटकूय सामकेच उणे आशिल्ले. तांचे तुळेन बकरवाल- बोकड्यो पाळपी- जमातीचे चड दिसताले.
आतंकवाद्यानीं देशांत नरसंहार करपाक पावल उखलचे आदींच तांकां काबार करून उडोवपा खातीर सशक्त गुप्तहेर यंत्रणेची गरज आसता. आमी कौटिल्य चाणक्याचे वारसदार म्हूण अभिमानान सांगतात. पूण आतंकवाद्याचीं ठिकाणां, तांच्यो गतिविधी हाची अद्ययावत माहिती मेळोवपा खातीर कौटिलीय कुटील गुप्त हेर यंत्रणेची आनी लायक गुप्तहेरांचे जाळें दुस्मान देशांत विणपाक आमी येसस्वी जाले नात. हल्ल्या उपरांत जैश- ए-मोहम्मद, लश्कर-ए-तायबा हांच्या ठिकाणांचेर हल्लो करून देशवासियांक सूड घेतलो हे दाखयत खूश करप हाचे पेल्यान तातूंतल्यान चडशे काय साध्य जायना. कांड करचे आदीच आतंकी आपले तळ रिते करतात. कांडा उपरांत फाफसून वेगवेगळ्या दिशेन कुस मारतात. पाक पुरस्कृत आतंकवादी हल्ल्यांक सशक्तपणान जाप दिवप देशातल्या दोनीय प्रमुख पक्षांच्या सरकारांक आतां मेरेन जमलें ना. फकत विरोधी पक्षांत आसतना चड बोवाळ करतात, जशे मोदी गुजरात मुख्यमंत्री आसतना करताले आनी राहूल गांधी आता विरोधी पक्षनेता आसतना करता.
हालींच्या वर्सांनी आमची गुप्तहेर संघटना कळमेल्ली दिसली. मुंबय 26- 11 हल्ल्या उपरांत तेन्नाचे प्रधानमंत्री डॉ. मनमोहन सिंगान, संरक्षण मंत्री, गृहमंत्री, गुप्तहेर संघटना प्रमुख, तिनूय सेनाप्रमुख हांची बसका आपयिल्ली आनी शेवटा पाकिस्ताना आड झूज न करता फकत हल्लेखोर लश्कर ए तायबाची ठिकाणां बाँब घालून उध्वस्त करपाचे हाचेर एकमत जाल्लें. पूण त्या ठिकाणांचे अक्षांश-रेखांशाची माहिती गुप्तहेर संस्थे कडेन नाशिल्ली. शिवाय बाँब घालपी विमानांक अचूक मारो करपाक ती ठिकाणां लेसरान खुणावपा खातीर थंय जमनीर गुप्तहेर नाशिल्ले कारणान चुकून नागरी भागांत बाँब पडून जिवित हानी जायत ह्या भंयान तो प्लॅनूय खुटयाळाक लायलो. फकत बंदी घालपाच्यो नागरी कारवायो जाल्यो, लश्करी कारवायो जाल्यो ना, जशे आतां चल्लां.
गुप्तहेर कारवायांत पाकिस्तानची आय.एस.आय आमचे परस उजवी दिसता. डीवायएसपी दविंदर सिंग आपले कारींतल्यान दोन हिजबूल मुजाहिदीन आतंकवाद्यांक श्रीनगरच्यान जम्मू व्हरतना ताका वाटेर धरिल्लो. पाकिस्तानी ड्रग विक्रेत्यां वांगडा संबद, निश्पाप काश्मिरी तरणाट्याचो एन्कांवटर, कैद्यांचो शारिरीक छळ सारकिल्ले आरोप ताच्या आड आदीं लागिल्ले. धाडीच्या वेळार ताच्या बंगल्यांत आतंकवाद्यांचो राबितो सिद्ध जाल्लो, शिवाय एके- 47 सारकिल्लीं शस्त्रां मेळिल्ली. संसद हल्ल्याच्या आतंकवाद्यांची वेवस्था करपा खातीर ताणें आपल्याचेर चेपण हाडिल्लें आनी त्या हल्ल्याचो तो सुत्रधार आशिल्लो अशें अफजल गुरून कोर्टाक बरोवन दिल्ले. तेन्ना ताची खोलायेन चवकशी करून आनीकूय राश्ट्रदोही प्रकरणां आनी देशद्रोह्यांक बेनकाब करपाची अपेक्षा आशिल्ली. पूण दविंदराक सेवेंतल्यान बडतर्फ करपी आदेशांत ताची चौकशी देशाचे सुरक्षिततेक धोकादायक थारतली असो तेन्नाच्या लेफ्टनंट गवर्नरान मारिल्लो शेरो अनाकलनीय दिसलो. हालींच मध्य प्रदेश पुलिसानी पाकिस्तानी आयएसआयक संवेदनशील म्हायतीची पुरवण करप 11 जणांक अटक केल्या. तातूंत सत्तापक्षाचे नेते, कार्यकर्ते आनी हिंदू धर्मीयांचो आस्पाव ही देशा खातीर चिंतेची, तितलीच लज्जेची गजाल.
आतंकी हल्ल्याचे प्रसंग घडले उपरांत टिवी चॅनल्सांनी रोखडेच सक्रीय जावन स्टुडीयोंत दोनीय देशां मदीं झूज लावपाची प्रथा दिसता. सरकारी यंत्रणा जैश आतंकी मास्टरमांयड हाफीज सईदाक सोदत आसा तर टिवी एंकर तो आपलो शेजारी जाल्लेवरी लाहोरांत तो रावता त्या सोसायटीचे विवरण दिता. दिसूयभर क्षेपणास्त्रां, लढाऊ विमाना, रणगाडे, बाँब स्फोट हांचो विडियो खेळ टिवीचेर लायिल्लो दिसता. उपरांत आदले सैनिक अधिकारी आड्डत झुजाची रणनिती सांगतना दिसतात. पहलगाम प्रसंगा उपरांत भारत-पाकिस्तान झूज सुरू जाल्यार त्या संदीचो फायदो घेत पाकिस्तानचे विरोधी बलोच आनी अफगाण हल्लो चडोवपाक शकतात ते सांगतात खरे, पूण वास्तवांत तें घडचें ना. ते पाकिस्तान विरोधी आसले तरी झूज प्रसंगात ‘काफीर’ देशा वांगडा उबे दिसचे नात.
तालिबानी आयज अफगाणिस्तानांत सत्तेंत आसले तरी तांचो डीएनए हो आतंकवाद्याचोच. अशरफ घनी थंयचो राश्ट्राध्यक्ष आसतना भारतीयां वतीन मोदीन मोगान भेट केल्ली संसद वास्तूचे मोदीन उद्घाटन केले उपरांत दुसऱ्या दिसा तालिबान्यांनी त्या वास्तूचेर ऱॉकेटांचो मारो केल्लो. तांकां पहलगाम प्रसंग समजावन सांगपा खातीर आनंद प्रकाश हांकां सरकारान धाडपा फाटली मुत्सद्देगीरी समजना. अफगाणिस्तान आयज पाकिस्तान, इराणा वांगडा चीनच्या इश्ट देश पंगडाचो तशेंच बेल्ट आनी रोड अर्थीक प्रकल्पाचो भाग जावन आसा. तालिबान सरकाराक मान्यता दिवन तांचो दुतावास उगडून असदुल्लाह बिलाल करिमी हांकां राजदूत म्हूण स्विकारपी चीन जगांतलो पयलो देश. चीनाच्या दबावाखाला इराण आनी अफगाणिस्तानान आमचे तांच्या देशांतले प्रकल्प भायरायल्यात. आयज ते देश चीनच्या उतरा भायर वच्चे नात.
टीवी स्टुडियोंत झूजाचो विडियो गॅम दाखोवन अजेंडा चलोवप सोपे पूण दोन देशांमदी कोण कितलो बळिश्ट आसा हाचेपरस कोण कसली रणनित वापरून कितल्या धैर्यान, धारिश्ट्यान झूजता ताचेर जैत निंबून आसता हे हालिंच्या झूजांचो इतिहास सांगता.
अफगाण मुजाहींदीनां मुखार बळिश्ट सोवियत सेना टिकली ना आनी हालीं लश्करी महासत्ता अमेरिकेक तालिबान्यानी धांवडावन घाले. 24 फेब्रेर 2022 दिसा दोन-तीन दिसांत युक्रेन काबिज करपाक भायर सरिल्ल्या पुतिनाक तीन वर्सा उपरांत झूज चालू दवरपा खातीर उत्तर कोरिया आनी चीनांतल्यान सैनिक उबारचे पडटात. वियतनामान अमेरिकेक धांवडून घाल्ली ताची 50 वी जयंती गेल्या सप्तकांत थंय मनयली. लांब पल्ल्याची अण्विक प्रक्षेपणास्त्रा ताफ्यांत आसत जाल्यार कुकुलोसो उत्तर कोरिया महासत्ता अमेरिकेक चाळोवपाक शकता. गेल्ले सप्तकांत येमेनी हुथी विद्रोहींनी अमेरिकेची प्रक्षेपणास्त्रां निरस्त केली. अमेरिकेच्या हल्ल्यांक दाद दिनासतना हुथींचे अमेरिकेची संपत्ती आनी मालवाहू जहाजांचेर आक्रमण चालूच आसा. हमास आतंकवाद्याक, पॅलेस्टायनींक मारपाक इस्रायलाक मजत दिवपी आनी स्वता हुथी विद्रोही आनी येमेनी नागरिकांक मारपी अमेरिकेन आमकां पहलगाम प्रसंगा उपरांत झूज न करता शांत रावपाचो उपदेश दिवप हे विडंबन.
आयज काश्मीर देंगणांतले तरणाटे पाकिस्तानी आतंकवाद्यांक सामील जाल्ले दिसतात ही आमचे खातीर धोक्याची घांट. त्या खातीर सेना, पुलिसदलां कडल्यान थळाव्या जनतेचेर आगळीक जावंनये ह्या बाबतीत सरकार प्रशासनान नजर दवरप म्हत्वाचें थारता. उदाहरण दिवपाचें जाल्यार मेजर लितूल गोगोय हाणें एका गावांत विरोध जाता ते पळोवन थंयच्यान सैनिका वांगडा सुखरूप भायर पडपा खातीर थळाव्या शिंप्याक जीपीच्या बोनेटाक बांदिल्लो. निरपराध नागरिकाक मानसीक यातना दिल्ले कारणान सेनेन शिस्तभंगाची कार्यवाही करपाची गरज आशिल्ली, पूण तेन्नाचे सेनाध्यक्ष बिपीन रावत हांणी तांची ह्या अकल्पित कृत्या बाबत तोखणाय केली, हाचें अजाप दिसलें. उपरांत थळावे नाबालिग चलयेक घेवन हो मेजर गोगोय श्रीनगरांत लॉजांत रूम मेळोवपा खातीर झगडी करपाक लागलो तेन्ना लोकांनी धरून पुलिसांच्या ताब्यात दिल्लो.
सेनेन ताचे कोर्ट मार्शल केलें खरें, पूण बडटी, वेतन वाडाय रोखप आनी बदली सारकी खास्त दिवन ताका सवाय भितर सोडोवन काडला म्हणुंयेता. सेना, पुलीस यंत्रणे कडल्यान थळाव्या नागरिकां आड कितेंय जाता तेन्ना ताच्या विरोधांत तरणाटे हातांत शस्त्रां घेवन आतंकवादी जातात आनी तांका थळाव्यांची सहानभूतीय मेळटा. हे काश्मिरांत घडलां. आतंकवादी बुरहान वाणीच्या मरणाक लाखांनी लोक एकठांय जाल्ले.
फकत कागदाचेर 370 हटयले म्हूण मुस्लीम बहुल काश्मीर खोरे खऱ्या अर्थान भारतीय समाजांत समरस जालें म्हणुयेना. त्या खातीर दोनीय वटेनची धार्मीक कट्टरता काबूत दवरपाची गरज आसा. हांगा देशांत मुस्लिमांक मुगल म्हणप, तांच्या धंद्याचेर बंदी घालप, रस्ते, गांवांची नांवां बदलप चल्लां. तर काश्मिरांत काश्मिरेतरांक ‘इंडियन’ म्हणटात. अनंतनागांत ‘त्या इंडियनान’ म्हणल्यार हांवें टॅक्सी बुक केल्ल्या अशें म्हजो टॅक्सीवालो दुसऱ्याक सांगतालो. अनंतनागाक थळावे लोक इस्लामबाद तर श्रीनगरांतले श्री न उच्चारतां एस- नगर म्हणटात. हें सगळें थंय समाजांत थोडे दीस वावुरलो जाल्यार कळटा, भोंवडेकार म्हूण न्हय.

दीपक लाड
पर्वरी