भांगरभूंय | प्रतिनिधी
मुंबय, खबरां संस्था : पहलगाम दहशतवादी हल्ल्याचो परिणाम आतां दिसपाक लागला. इंडियन रेल्वे कॅटरिंग अँड टुरिझम कॉर्पोरेशनान (आयआरसीटीसी) २५ एप्रिला उपरांतच्यो जम्मू आनी काश्मीरच्यो पयलींच नियोजीत केल्ल्यो भोंवड्यो सध्या रद्द केल्यात. प्रवासी, पर्यटकांच्या सुरक्षीतताये खातीर खबरदारीचो उपाय म्हणून हो निर्णय घेतला.
भारतीय रेल्वेची पर्यटन शाखा म्हणून आयआरसीटीसी वळखतात. जम्मू आनी काश्मीरच्या पर्यटना खातीर आयआरसीटीसी कडल्यान ‘जन्नत-ए-काश्मीर विथ वैष्णोदेवी दर्शन’, ‘काश्मीर-द पॅरेडाइज ऑन अर्थ’, ‘अतुल्य भारत’ अशा विवीध काश्मीर भोंवडेचें नियंत्रण करतात. फुडली सुचवणी मेळ मेरेन जम्मू आनी काश्मीर वचपा खातीरच्यो सगल्यो भोंवड्यो स्थगीत केल्यात. हाचे पयलीं काश्मीर भोंवडे खातीर आरक्षण केल्ल्या पर्यटक प्रवाशांक ती रद्द करपाची आसल्यार तांकां पुराय परतावो दितले. पर्यटक प्रवाशांची सुरक्षितताय सगल्यांत पयलीं आसा, अशें आयआरसीटीसींतल्या अधिकार्यांनी सांगलें.
सध्याचे स्थितींत आयआरसीटी टुरा वरवीं जम्मू आनी काश्मीरांत १७० पर्यटक गेल्यात. हांतले २० मुंबयचे आसात. मुंबयच्या पर्यटकां कडेन संवाद सुरू आसा. तांत परतवपाचें आसल्यार तांकां सुरक्षीत मुंबय पावयतले.
… जाल्यार सगलें सुरळीत जातलें
आयआरसीटीसीच्या जम्मू आनी काश्मीरच्या दरेके भोंवडेंत सुमार ३० पर्यटक-प्रवाशांचो आसपाव आसता. काश्मीरांतले सगले परिस्थितीचेर लक्ष आसा. सुरक्षा यंत्रणां कडल्यान सकारात्मक प्रतिसाद मेळ्ळ्यार भोंवडी सुरळीत जातली, अशेंय अधिकार्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
