पर्वरे मोटारीचो लासून गोबोर

भांगरभूंय | प्रतिनिधी

म्हापशें: पर्वरे विद्या प्रबोधिनी विद्यालया कडेन धांवपी मोटारेन पेट घेतलो. तातूंत मोटारीचो गोबोर जाल्ल्यान दोन लाखांचें लुकसाण जालें. दोगा दुचाकी चालकांनी वेळकाळ वळखून केल्ले मजतीक लागून मोटारींतलें कुटुंब वाटावलें.

ही घडणूक शेनवारा सांजेच्या 7.45 वरांच्या सुमाराक घडली. करंजाळे पणजेचे संजीत वाही हे डीएल 3 सीसीके 2652 नंबराचे होंडा जाझ मोटारीन घरकान्न आनी सात वर्सां पिरायेचे चलये वांगडा पर्वरेच्यान पणजे वताले. विद्या प्रबोधिनी लागसार तांचे मोटारीची लायट अचकीत बंद जाली. तशेंच ते फुडें मॅकानीक मेळत हे आशेन फुडे गेले. मुखा वयल्यान येवपी दुचाकी चालकांक मोटारीच्या इंजिनांतल्यान धुंवर येता तो दिसलो. तांणी दुचाकी मोटारी मुखार आडवी घालून वाही हांकां खबर दिली. वाही ताकतिकेन घरकान्न आनी चलये सयत मोटारींतलो भायर आयलो. तेन्ना रोखडोच मोटारीन पेट घेतलो आनी पळयता पळयता तिचो लासून गोबोर जालो. हे गडबडींत तांचो मोबायल मोटारींतूच उरलो, ताचोय लासून गोबोर जालो.

वाही हांणी आपले घरकान्नीच्या मोबायला वयल्यान उजो पालोवपी दळाक हाची म्हायती दिली. घडणुकेची म्हायती मेळटाच पर्वरी उजो पालोवपी दळाचे हवालदार नारायण मंजी, इप्रिमो डायस, गौरीश नायक, सचीन गांवकार आनी सोहन चोपडेंकार ह्या जवानांनी घडणुकेचे सुवातेर येवन उजो पालयलो. पूण ते मेरेन मोटारीचो गोबोर जाल्लो.