भांगरभूंय | प्रतिनिधी
म्हापशें : चवथीक मुंबय गेल्ल्या नागवेंकार कुटुंबाचो बंद फ्लॅट फोडून चोरांनी 5 लाखांच्यो वस्तु लुटल्यो. ही घडणूक पर्वरेच्या पुंडलीक नगरांत घडली.
स्कायलार्क अपार्टमेंटांत रावपी अनीश नागवेंकार आपल्या कुटुंबा सयत फ्लॅट बंद करून मुंबय गेल्ले. 30 तारखेक सांजेर 8 क गेल्ले आनी सोमारा सुमार 4.45 वरांचेर घरा परतले. तेन्ना तांकां फ्लॅटाचें मुखेल दार उक्तें आशिल्लें दिसलें. भितर सरले तेन्ना घरांतल्यो सगल्यो वस्तू अस्ताव्यस्त पडिल्ल्यो.
चोरांनी आलमारी मोडून भांगराचो हार, भांगराच्यो तीन सरपळ्यो, कानांतलीं जोडी, तीन कडा, चार मुदयो, चार पेडंट, पांच कान फुलां, एक बंद, रुप्याची गणेश मूर्त आनी हेर भांगर- रुप्याच्यो मेळून 5 लाखांच्यो वस्ती चोरून व्हेल्यो. चोरांनी वस्ती सोडल्यार हेर खंयच्याच वस्तूंक हात लायलो ना. रोख आनी लॅपटॉप व्हरूंक ना.
नागवेंकारान रोखडोच पर्वरी पुलिसांक फोन केलो. उप अधीक्षक विश्वेश कर्पे आनी निरिक्षक अनंत गांवकार आपल्या सहकाऱ्यां वांगडा थंय पावले आनी पंचनामा केलो. अज्ञात चोरांचेर पुलिसांनी कलम 454, 457 आनी 380 खाला केस नोंद केल्या. पुलीस फुडली चवकशी करतात.
फाटल्या स दिसांत एकाच अपार्टमेंटाच्या लागसारच्या चार फ्लॅटांनी चोरी जाल्या. देखून ह्या वाठारांत भंयाचे वातावरण पातळ्ळां.
मजगतीं, चवथी वेळार घरां बंद करून गांवा भायर वचपी लोकांक घरां विशीं म्हायती दिवपा खातीर पुलिसांनी आवाहन केलें. पूण लोकांनी ह्या सल्ल्या कडेन दुर्लक्ष केल्ल्यान अंदूंय राज्यांत सदचे भशेन घरां फोडपाचीं प्रकरणां व्हड प्रमाणांत जायत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
