भांगरभूंय | प्रतिनिधी
33 सिलिंडर जप्त; धनया आड गुन्यांव नोंद
म्हापशें: पर्वरे मेसर्स तळकार गॅस सर्व्हीस ह्या हिंदुस्थान पेट्रोलियम कॉर्पोरेशन लिमिटेडच्या (एचपीसीएल) गुदांवाचेर वजन आनी माप खात्याच्या पंगडान धाड घालून मर्यादे परस उण्या वजनाचें 33 घरगुती सिलिंडरा सयत हेर साहित्य जप्त केलें.
गिरायकां कडल्यान आयिल्ल्या कागाळीच्या आदारान खात्याच्या पंगडान ही धाड घाली. गुदांवांतल्या सगल्या गॅस सिलिंडराची तपासणी केली. त्या वेळार ह्या 14.2 कील वजनाच्या सिंलिंडरां मदीं 2.75 कील गॅस उणो आशिल्ल्याचें दिसून आयलें.
पंगडान वजन काट्या वरवीं घरगुती तशेंच वेवसायीक गॅस सिलिंडराच्या वजनाची पडटाळणी केली. मर्यादे परस उण्या वजनाचे 33 गॅस सिलिंडर तशेंच एक लवचीक संलग्नक पायप आनी एका सिलिंडरांतल्यान दुसऱ्या सिलिंडरांत गॅस हस्तांतरा खातीर वापरतात तो स्पॅनर लेगीत जप्त केलो.
सदर गॅस एजन्सीच्या धनया आड खात्याच्या पंगडान वजन आनी माप कायदो 2009 आनी नेम 2011 खाला गुन्यांव नोंद करून फुडलो तपास सुरू आसा.
खात्याचे प्रभारी नियंत्रक अरूण पंचवाडकार हांच्या मार्गदर्शना खाला सहाय्यक नियंत्रक देमू मापारी, नितीन पुरूषण, निरिक्षक सिध्देश शिरगांवकार, विकास कांदोळकार, सतीश गांवस आनी कर्मचारी वर्गान ही कारवाय केली.
मजगतीं, गिरायकांनी गॅस सिलिंडराचें वजन तपासून आनी शहानिशा करूनच खरेदी करची. कसलोय दुबाव आयल्यार खात्या कडेन संपर्क सादचो अशें आवाहन खात्या वतीन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
