भांगरभूंय | प्रतिनिधी
मुख्यमंत्री: येरादारी विभागाचें उक्तावण
म्हापशें: पर्वरे म्हामार्गार वाहन येरादारीचें प्रमाण वाडलां. उड्डाण पूल उबारले बगर ही येरादारीची समस्या उणी जावची ना. फुडलीं दोन वर्सां लोकांक त्रास सोंसचे पडटले. रस्त्याचें रुंदीकरण बी कामां करपाची येवजण आसून पर्वरेंतल्या लोकांनी सहकार्य करचें अशें आवाहन मुख्यमंत्री डॉ. प्रमोद सावंत हांणी केलें.
मंगळारा सांजवेळा पर्वरी पुलीस स्टेशनाचे इमारतींत येरादारी पुलीस विभागाचें उक्तावण केले उपरांत मुख्यमंत्री उलयताले.
ह्या वेळार पर्यटन मंत्री रोहन खंवटे, आमदार केदार नायक, पुलीस म्हासंचालक जसपाल सिंग, म्हानिरिक्षक ओमवीर सिंग बिष्णोई, येरादारी अधिक्षक बोसेट सिल्वा, उपअधिक्षक सिद्धांत शिरोडकार, विश्वेश कर्पे, निरिक्षक अनंत गांवकार, सचीन नार्वेंकार, सरपंच स्वप्नील चोडणकार, जि.पं. वांगडी कविता नायक, पंच वांगडी आनी पुलीस कर्मचारी हाजीर आशिल्ले.
पर्यटन मंत्री रोहन खंवटेन म्हणलें, पर्वरे म्हामार्गार मॉल आनी हेर सुवातींनी येरादारीची कोंयडी जायत आसता. ह्या येरादारी पुलीस विभागाक लागून वाहन येरादारीचेर नियंत्रण योग्य तरेन जातलें. मुख्यमंत्र्यांनी ह्या येरादारी पुलीस विभागा खातीर गरजेच्यो साधनसुविधा पुरोवपाची हमी दिल्या.
पुलीस म्हासंचालक जसपाल सिंग हांणी प्रस्तावीक केलें. अधिक्षक बोसेट सिल्वा हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
