भांगरभूंय | प्रतिनिधी
भांगरभूंय । प्रतिनिधी
पर्वरीः आझादीका अमृत महोत्सवा निमतान पर्वरी मतदारसंघातलीं 5 हजार घरां आनी आस्थापनांनी 13 तें 15 ऑगस्ट मजगतीं तिरंगे लावपाचें पर्वरी भाजपा मंडळान थारायलां. मंडळाचो अध्यक्ष किशोर अस्नोडकार हांणी एके पत्रकार परिशदेंत ही म्हायती दितना पर्वरचो आमदार रोहन खवंटे हांणी पर्वरी रावपी लोकांक दिवपा खातीर पांच हजार तिरंगे विकते घेतल्यान अशें सांगलें.
संजय पेडणेकार, रंजन पार्सेकार, राज पेडणेकार (सुकूर), संदीप साळगांवकार, विजय दळवी (साल्वादोर द मूंद), घनश्याम नायक आनी सिद्देश नायक (पेन्ह द फ्रान्का) हाचे कडल्यान लोकांक मेळटले. लोकांक 25 रुपये दिवन तिरंगो घेवपाक मेळटलो अशें अस्नोडकारान सांगलें.
13 तें 15 ऑगस्ट मजगती भाजप मंडळा वतीन सायकल फेरी, मशाल यात्रा आनी 15 ऑगस्टाक आझाद भवनांत सकाळीं 11 वरांचेर पर्वरी मतदारसंघांत राबित्याक आशिल्ल्या सुटके झुजाऱ्यांचो रोहन खवंटे हांचे हस्तुकीं भोवमान करतले. सेल्फी विथ तिंरगा सर्त घेतले. दरेका घरांतल्या लोकांनी सगल्यांत ल्हान भुरग्याचे हस्तुकीं घराचेर तिरंगो लावून ताचो फोटो 7887809750 ह्या व्हॉट्सअॅप नंबराचेर धाडपाचें आवाहन किशोर अस्नोडकार हांणी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
