भांगरभूंय | प्रतिनिधी
म्हापशें, प्रतिनिधी ः पर्वरे आपल्या वाठारांत फुलां काडपी एका ज्येश्ठ नागरिकाक धोंगी पुलिसांनी नाडलो. फिर्यादी मनोहर कोरगांवकार हांच्या गळ्यांतली सरपळी आनी मुदी मेळून १ लाखांचो माल चोरांनी चोरलो.
ही घडणूक २२ तारखेर सांजेवेळार ४ वरांचेर पर्वरीच्या श्री हनुमान महारूद्र मंदिरा लागसारा घडली. जाल्यार २३ नोव्हेंबराक तांणी पुलिशेंत कागाळ दिली. फिर्यादी कोरगांवकार हे आपल्या आंगणांतलीं फुलां काडटाले. ह्या वेळार दुबावीत थंय आयलो आनी आपूण पुलीस आशिल्ल्याचें सांगून पर्वरी चोर भोंवतात. ताका लागून भांगर घालून भोंवनाका. अशें कोरगांवकार हाका सांगून ताका आंगावयल्यो वस्ती काडपाक लायल्यो.
कोरगांवकार हांणी ४ ग्रॅम वजनाची मुदी आनी २० ग्रॅम वजनाची सरपळी काडली. ह्यो वस्ती दुबावितान कागदांत गुठलायल्यो आनी कागद काडून फिर्यादींच्या बोल्सांत घालें. घरा वचून तें कागद उघडून पळयल्यार तातूंत फातर आसले. तें पळोवन आपल्याक फटयल्ल्याचें कळटांत तांणी पर्वरी पुलीस स्टेशनार वचून चोरां आड कागाळ नोंद केली.
ते प्रमाण भा.दं.सं.च्या १७० आनी ३७९ कलामा खाला चोरां आड गुन्यांव नोंद केलो. फुडलो तपास पुलीस निरीक्षक राहूल परब हांच्या मार्गदर्शना खाला उपनिरीक्षक संकेत तळकार करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
