भांगरभूंय | प्रतिनिधी
-एनइपी खाला शिक्षक प्रशिक्षण संस्था जातली
० २६ जानेवारी पयलीं सुटके झुजार्यांच्या भुरग्यांचो नोकरेचो प्रस्न सुटट्लो
० कूळ मुंडकारांचे आडखळून उरिल्ले खटले निकालांत काडपा खातीर प्रक्रिया सुरु
पणजी, प्रतिनिधी : पर्वरेची येरादारी कोयंडी उणी करपाच्या हेतान ६४१ कोटींच्या प्रस्तावीत उड्डाणपुल रस्तो प्रकल्पचो बुनियादी फातोर २२ डिसेंबराक बसयतले. ह्याच दिसा जुआरी पुलाचे दुसरे लेनीच्या उक्तावणा सयत २७० कोटींच्या घोळट्या रेस्टॉरंटाच्या कामाचो शुभारंभ जातलो, अशें मुख्यमंत्री डॉ. प्रमोद सावंत हांणी सांगलें.
गोंय विद्यापीठ मैदानाचेर आयज गोंय मुक्तीदिसाची कार्यावळ जाली. तिरंगो हुबयल्या उपरांत मुख्यमंत्री सावंत हांचें भाशण जालें. गोंय मुक्ती खातीर बलिदान दिवपी सुटके झुजार्यांक मुख्यमंत्र्यानी आर्गां ओंपलीं. केंद्रीय तशेंच राज्य सरकाराच्या कल्याणकारी येवजण्यांचो नियाळ घेतना मुख्यमंत्र्यान कांय म्हत्वाच्यो घोशणा केल्यो.
येवपी २६ जानेवारी पयलीं सुटके झुजार्यांच्या भुरग्यांचो नोकरेचो प्रस्न सुटट्लो. कूळ मुंडकारांचे आडखळून उरिल्ले खटले निकालांत काडपा खातीर प्रक्रिया सुरु जाल्या. राष्ट्रीय शेतकी विकास येवजणे खाला राज्यान केंद्राक ७०० कोटींचो प्रस्ताव सादर केला. ६० % निधी केंद्रा कडल्यान मेळटलो. फाटल्या वर्साचे तुळेंत राज्याची येणावळ ३०% वाडल्या. शिक्षण, उद्देग, शेती, भलायकी ह्या सगळ्या मळांचेर राज्याची उदरगत नेटान सुरु आसा, अशें मुख्यमंत्र्यान सांगलें.
विश्वकर्मा येवजणे खाला २० हजार परंपरीक वेवसायिकांची नोंदणी जाल्या. ह्या सगल्यांक वळखपत्र दिवपा सयत प्रशिक्षण दितले. राज्यांत १५६४६ कोटींची ऊद्देगीक गुंतवणूक जाल्या. हे गुंतवणुकीतल्यान ४० हजार लोकांक गुंतवणुकिची संद तयार जातली. राज्यांतल्या ९७% शेतकारांकडेन किसान क्रेडीट कार्ड आसा. कर्मचारी भरती आयोगा वरवीं बेगिनूच कर्मचारी भरतीची जायरात जारी जातली. २०५० मेरेन कार्बन उत्सर्जानाचे प्रमाण शुन्य टक्के करपाचे राज्याचे उद्दीष्ट आसा, अशें मुख्यमंत्री सावंत हांणी सांगलें.
हे कार्यावळीक मंत्री बाबुश मोन्सेरात, मंत्री सुदिन ढवळीकार, सरकारी अधिकारी आनी हेर मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
