भांगरभूंय | प्रतिनिधी
डॉ. दिव्या राणेः वाळपय- ठाणे रस्त्याच्या रुंदीकरणाक, हॉटमिक्सिंगाक 3.33 कोटी खर्चाच्या प्रस्तावाक मंजुरी
भांगरभूंय । प्रतिनिधी
वाळपयः पर्यें मतदारसंघांतलीं उदरगतीचीं कामां टप्प्याटप्प्यांत पुराय करपाचो यत्न करतले. सरकार दरबारांत सादर केल्ल्या प्रस्तावांक मंजुरी मेळपाक लागल्या. उरिल्ले प्रस्ताव लेगीत मंजूर जातले, अशी आस्त आमदार डॉ. दिव्या राणे हांणी उक्तायली.
वाळपय- ठाणे रस्त्याचें 3.33 कोटी रुपया खर्च करून रुंदीकरण आनी हॉटमिक्स डांबरीकरण करपाच्या कामाक सुरवात करून दिले उपरांत आमदार डॉ. राणे उलयताली. ठाणेच्या मंडळगिरो- कोळगिरा देवस्थानाच्या प्राकारांत कामाक सुरवात केली.
ह्या वेळार ठाणेची सरपंच सरिता गांवकार, पंच निलेश परवार, निलेश शंभा परवार, तनया तुळशीदास गांवकार, सुरेश काशीनाथ आयकार, विनायक उत्तम गांवस, अनुष्का अनंत गांवस, सुभाष चंद्रू गावडे, संचिथा प्रेमकुमार गांवकार, सोनिया संतोष गांवकार आनी हेर मानेस्त हाजीर आशिल्ले.
भौशीक बांदकाम खात्याचे मंत्री निलेश काब्राल हांणी पर्यें मतदारसंघांतल्या वेगवेगळ्या वाठारांतल्या रस्त्यांक मंजुरी दिल्या. तशेंच खूबशा प्रस्तावांक मंजुरी मेळटली, अशी आस्त डॉ. राणे हांणी उक्तायली.
वाळपय- ठाणे रस्त्याचेर हॉटमिक्स डांबर घालचो, अशी मागणी फाटल्या कितल्याशाच वर्सां सावन थळावे लोक करताले. ह्या संबंदांतलो प्रस्ताव सरकाराक सादर केल्लो. ह्या रस्त्याचें रुंदीकरण करून ताचें हॉटमिक्सींक केले उपरांत लोकांक जावपी त्रास पयस जातले, अशीय आस्त डॉ. राणे हांणी उक्तायली.
सरपंच गांवकार हांणी सांगलें, ठाणे पंचायत वाठारा सावन शार सुमार 9 किलोमिटर अंतराचेर आसा. वाळपय ठाणे रस्त्याचेर दिसान दीस येरादारी व्हड प्रमाणांत वाडत आसा. हाका लागून रस्त्याचेर नव्यान डांबरीकरण करचें, अशी मागणी ह्या वाठारांतले लोक करताले. आतां ही मागणी पुराय जाल्या.
मजगतीं, पाली सावंतवाडीच्या उदरगतीच्या कामांक डॉ. राणे हांचे हस्तुकीं सुरवात जाली. सुमार 55 लाख रुपया खर्च करून गटार बांदकाम आनी पुलाचें बांदकाम करतले. दोनूय कामा संबंदांत अदीक म्हायती दितना भौशीक बांदकाम खात्याचे सहाय्यक अभियंते देवेंद्र वेलिंगकार हांणी सांगलें, ठाणे- वाळपय मेरेनचो 9 किलोमिटर अंतराच्या रस्त्याचें रुंदीकरण आनी हॉटमिक्सींग करतले. जंय शक्य आसा थंय रुंदीकरण करतले आनी ताचे हॉटमिक्सींक डांबर घालतले. तशेंच पाली सत्तरी वाठारांत अपघाताची शक्यताय आशिल्लो रस्तो रुंद करचो तशेंच पूल बांदचो अशी मागणी ह्या वाठारांतल्या लोकांनी केल्ली. ते संबंदांतलो प्रस्ताव सरकाराक सादर केले उपरांत त्या कामांक मंजुरी मेळ्ळ्या. ह्या कामाक आयच्यान (बिरेस्तार) सुरवात केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
