भांगरभूंय | प्रतिनिधी
-मुख्यमंत्रीः 40 गांव वगळावपाची केंद्रीय समिती कडेन मागणी
पणजी : पर्यावरण संवेदनशील वाठारांत 99 तल्यान चडांत चड 69 गांवांचो आस्पाव जावप शक्य आसा. पर्यावरण संवेदनशील वाठारांत (ईएसए) गांवांचो आस्पाव जालो तरी शेती करपा सयत घरां दुरुस्ती करपाची मेकळीक आसतली, अशें मुख्यमंत्री डॉ. प्रमोद सावंत हांणी स्पश्ट केलां.
केंद्रीय रानां आनी पर्यावरण मंत्रालयाच्या तज्ञ समितीन गोंयाक भेट दिली. ह्या वेळार आमदारांनी लोकां सयत गांव पर्यावरण संवेदनशील वाठारांतल्यान वगळावपाची मागणी केली. अध्यक्ष संजय कुमार हांचे फुडारपणा खाला समितीन मुख्यमंत्री डॉ. प्रमोद सावंत हांची भेट घेतली. कस्तुरंगन समितीन 99 गांवांचो आस्पाव पर्यावरण संवेदनशील वाठारांत केला. हातूंतले 40 गांव वगळावपाची मागणी अापणें समिती कडेन केल्या. केंद्रीय पर्यावरण मंत्री भुपेंद्रसिंग हांकां पत्र बरोवन ही मागणी हाचे पयलीच केल्या, अशें मुख्यमंत्र्यांनी सांगलें.
पर्यावरण संवेदनशील वाठाराचे निकश 40 गांवांक लागनात. ते खातीर ते गांव वगळावपाची मागणी केल्या. तरी लेगीत आनीक 10 गांवांचो आस्पाव पर्यावरण संवेदनशील वाठारांत जावप शक्य आसा. ते खातीर 69 गांवांचो आस्पाव पर्यावरण संवेदनशील वाठारांत जातलो, अशें मुख्यमंत्री डॉ. प्रमोद सावंत हांणी पत्रकारां कडेन उलयतना सांगलें.
पर्यावरणी संवेदनशील वाठारांत घरां दुरुस्त करपाची मेकळीक आसा. शेती करपाची मेकळीक आसा. प्रदुशणकारी रेड कॅटेगरीच्या उद्देगांक आनी खण उद्देगाक मान्यताय ना, अशें मुख्यमंत्री डॉ. प्रमोद सावंत हांणी सांगलें.
पर्यावरणाची जतनाय आनी उपजिविकेच्या साधनांचा विचार करून समिती निर्णय घेतली, अशें समितीचे अध्यक्ष संजय कुमार हांणी स्पश्ट केलां. आमदार देविया राणे तशेंच मंत्री सुभाष फळदेसाय हांचे फुडारपणा खाला सगलेच गांव वगळावपाची मागणी जाली. सगलेच गांव संवेदनशील वाठारांतल्यान वगळावप शक्य ना, अशें स्थितीचो विचार केल्यार कळटा. पर्यावरण तज्ञ समितीन सत्तरी म्हालाक भेट दिवन लोकां कडेन चर्चा केली. ह्या वेळार आमदार देविया राणे हाजीर आशिल्ल्यो. तशेंच समितीन खोला गांवाक भेट दिवन लोकां कडेन चर्चा केली. ह्या वेळार समाज कल्याण खात्याचे मंत्री सुभाष फळदेसाय हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
