भांगरभूंय | प्रतिनिधी
-इमारत बांदकाम, उद्देग, खण, डिस्टलरी वेवसायांचो अास्पाव
पणजी : राज्यांतल्या विवीध वेवसाया खातीर लागपी पर्यावरणीय दाखल्या खातीरचें नवे दर जाहीर केल्यात. हालींच हे विशीं खात्याची संचालक डॉ. स्नेहा गिट्टे हांणी हो आदेश जारी केला. आदेशा प्रमाण खण, इमारत बांदकाम, उद्देग, डिस्टलरी प्रकल्प तशेंच म्हामार्ग बांदकाम आनी रुंदीकरणा खातीर लागू जातलो.
आदेशा प्रमाण 100 हॅक्टर मेरेनच्या मुखेल खनीज उत्खनन खणींच्या पर्यावरणीय दाखल्या खातीर 7 लाख 50 हजार रुपया शुल्क आशिल्लें. आतां 100 ते 200 हॅक्टरा खातीर 10 ते 20 लाख रुपया शुल्क आसतलें. जाल्यार क्षेत्रफळा प्रमाण खणींच्या विस्तारा खातीर 3 ते 10 लाख रुपया शुल्क फारीक करचे पडटलें. गौण खनीज बेसोल्ट खातीर 75 हजार जाल्यार चिरे खणी खातीर 30 हजार रुपया शुल्क फारीक करचें पडटलें.
इमारत बांदकाम प्रकल्पाचो विचार केल्यार 20 हजार ते 1 लाख 50 हजार चौखण मि. क्षेत्रफळाच्या बांदकामा खातीर 2 लाख रुपया जाल्यार 3 लाख चौखण मिटर क्षेत्रफळाच्या टावनशिप बांदकामा खातीर 3 लाख रुपया शुल्क आसतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
