भांगरभूंय | प्रतिनिधी
भांगरभूंय । प्रतिनिधी
केंपेंः पर्यावरणाचो सांबाळ केल्यार आमी बरे भशेन जगपाक शकतले. ताका लागून पर्यारवणाचो सांबाळ करप ही दरेकल्याची लागणूक आसा अशें समाज कल्याण मंत्री सुभाष फळदेसाय हाणे केंपें सरकारी म्हाविद्यालय आनी केंपें पालिका मंडळान आयोजीत केल्ल्या मिशन बाय प्लास्टिक कार्यावळींत मुखेल सोयरो म्हणून उलयतना सांगलें. ह्या वेळार नगराध्यक्ष सुचिता शिरवयकार, नगरसेवक प्रसाद फळदेसाय, प्राचार्य जयदीप भट्टाचार्य, राजेंद्र कुलकर्णी आनी हेर मानेस्त हाजीर आशिल्ले.
प्लास्टिक मनशान उपेगांत हाडलें. आतां तें सगळे कडेन जालां आनी ताचे पसून पर्यावरणाक आशिल्लो धोको सामकार आयला. तातूंतल्यान मुक्ती मेळपा खातीर प्लास्टिकाचो वापर करपाचें आमी थांबोवपाक जाय. प्लास्टिकाचे सुवातेर मॅटल बोटल, कपड्यांच्यो पिशव्यो वापरपाक जाय अशें फळदेसायान सांगलें. फाटल्या कांय वर्सां सावन केंपें म्हाविद्यालय प्लास्टिकाच्या धोक्या विशीं लोक जाग्रुताय करता ही तोखणाय करपा सारकी गजाल आसा. प्लास्टिक बाय उपक्रमा खाला विद्यार्थिनींनी प्लास्टिकाच्यो 20 हजार बाटल्यो एकठांय केल्यात. आमी प्लास्टिकाचो उपेग करचो ना असो दरेकान संकल्प करपाचो वेळ आयला अशेंय ताणे सांगलें.
नगरसेवक प्रसाद फळदेसाय आनी हेर मानेस्तांनी ह्या वेळार प्लास्टिकाचो उपेग कमी करपाक जाय अशें सांगलें. ह्या वेळार केंपें म्हाविद्यालय तें केंपें पालिका चौका मेरेन रॅली काडली. ताचें संचालन किरण नायक हाणे केलें. सुदेश शेटकारान निमाणे उपकार मानले. सुभाष फळदेसाय हाणे रॅलींत वांटो घेतलो. पालिका वाठारांत एकठांय केल्लो प्लास्टिक कोयर ताणे ट्रकांत भरपाक मजत केली.
——————-
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
