भांगरभूंय | प्रतिनिधी
मुख्यमंत्री: पयल्या सौर उर्जे वयले हायब्रीड फेरीबोटीचें उक्तावण
पणजी: पर्यावरणाची जतनाय करपा खातीर गोंय सरकार सौर उर्जा प्रकल्पांचेर भर दिता आनी ते नदरेन काम सुरू आसा. न्हंय येरादारी खात्या वतीन पयल्या सौर उर्जे वयले हायब्रीड फेरीबोटीचो फायदो लोकांक जातलो. ही फेरी चोडण ते पणजी ह्या मार्गार प्रवाशां खातीर सुरवातेक प्रायोगीक तत्वाचेर चलयतले. रोखडीच सौर उर्जे वयल्यो आनीक दोन फेरीबोटींचें लोकार्पण जातलें अशें आस्वासन मुख्यमंत्री डॉ. प्रमोद सावंत हांणी दिलें.
काल (बिरेस्तारा) पयल्या सौर उर्जे वयल्या हायब्रीड फेरीबोटीचें आनी उफेत्या जेटी प्रकल्पाचें उक्तावण केंद्रीय आयुष मंत्री आनी बंदरां, शिपींग आनी न्हंय येरादारी मंत्री सर्बानंदा सोनोवाल हांचे हस्तुकीं जालें.
ह्या वेळार मुख्यमंत्री डॉ. प्रमोद सावंत, केंद्रीय राज्यमंत्री श्रीपाद नायक, मंत्री सुभाष फळदेसाय, मंत्री बाबूश मोंसेरात, पणजी म्हानगरपालिकेचे म्हापौर रोहीत मोंसेरात आनी हेर मानेस्त हाजीर आशिल्ले.
सौर उर्जेचेर फेरीबोट तयार करपा खातीर गोंय सरकारान 3.97 कोटी रुपया खर्च केल्यात. तशेंच केंद्र सरकारान मजत केल्ल्यान हें शक्य जालां. ही फेरीबोट खास प्रवाशां खातीरच आसा. ताका लागून चोडणा सावन पणजे येवपी प्रवाशांक आपल्यो मोटारी, दुचाकी थंयच दवरून येवचें पडटलें. हाका लागून पार्कींग समस्याय जावची ना आनी पॅत्रॉलूय वाटावतलें. ही फेरी सुरवातेक प्रायोगीक तत्वाचेर सुरू आसतली. तशेंच 15 दीस सगल्यां खातीर फुकट आसतली. उपरांत न्हंय येरादारी खात्या कडल्यान तिकेटीची रक्कम थारायतले अशेंय डॉ. प्रमोद सावंत हांणी सांगलें.
गोंयांत खूबशे पर्यटनाचे उपक्रम राबयतात. गोंयांत आतां हॅलिकॉप्टर सेवा सुरू आसा. पर्यटकां खातीर बस सेवा सुरू जातली. आमी चडांत चड सौर उर्जे वयले उपक्रम राबयत आसात. जेणे करून पर्यावरणाचो सांबाळ जावंक शकतलो. फुडारांत गोंयांत अशे खूबशे सौर उर्जे वयले प्रकल्प गोंयांत येतले अशेंय ह्या वेळार डॉ. प्रमोद सावंत हांणी सांगलें.
विवीध सौर प्रकल्प तयार जाले जाल्यार गोंयांत येवपी संवसारीक आनी देशी पर्यटकांची संख्या आनीक वाडटली.
गोंय संवसारीक पर्यटन थळ: सोनोवाल
सौर उर्जे वयल्या आनी विजे वयल्या प्रकल्पांक केंद्र सरकार मजत करता. प्रधानमंत्री नरेंद्र मोदी हांचो कलूय ह्याच दोनूय विशयांचेर आधारीत प्रकल्पांचेर आसा. केंद्र सरकार विकासा खातीर खूबशे उपक्रम राबयत आसा. गोंय हें संवसारीक पर्यटन थळ आशिल्ल्यान गोंय सरकारा वतीन गोंयांत खूबश्यो मुळाव्यो सुविधा विकसीत करीत आसात अशें केंद्रीय मंत्री सर्बानंदा सोनोवाल हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
