भांगरभूंय | प्रतिनिधी
-पर्यटनांत गोंय पावले 10 वर्सां फाटीं
-प्री कोविडचे तुळेंत पोस्ट कोवीड काळांत विदेशी पर्यटकांचो आंकडो उणोच
पणजी : गोंयाक भेट दिवपी पर्यटकांचो आंकडो वाडत आसलो तरी कोवीड पयलींचे तुळेंत तो सामको उणो आसा. देशी तशेंच विदेशी पर्यटकांचो आंकडो वाडोवन पर्यटन उद्देग सांबाळपाचें आव्हान सरकारा मुखार कायम आसा. विदेशी पर्यटकांच्या आंकड्यांचो विचार केलो जाल्यार राज्य 10 वर्सां फाटीं पाविल्ल्याचे लक्षांत येता.
कोवीड म्हामारी पयलीं म्हणल्यार 2019 वर्सा 71.2 लाख देशी आनी 9.37 लाख विदेशी पर्यटकांनी गोंयाक भेट दिल्ली. कोविडा उपरांत म्हणल्यार 2022 वर्सा 70.1 लाख देशी आनी 1.75 लाख विदेशी पर्यटकांनी भेट दिल्ली. 2023 वर्स अजून सोंपपाचे आसा. जुलय मेरेन 2.81 लाख विदेश पर्यटकांनी भेट दिल्ल्याची नोंद आसा.
2012 वर्सा सावन देशी आनी विदेशी पर्यटकांचे आकडे पळयल्यार ते दर वर्सा वाडत गेले. 2012 ते 2019 वर्सा मेरेन गोंयाक भेट दिवपी देशी आनी विदेशी पर्यटकांचो आंकडो वाडत गेलो. 2020 वर्सा कोवीड म्हामारी पुराय संवसारांत सुरू जाली. मार्च उपरांत निर्बंध लागू जाले. विमान सेवा, रेल्वे सेवा बंद जाल्ल्यान पर्यटक येवप बंद जाले. 2020, 2021 ही दोन वर्सां गोंयांत सामके उणें पर्यटक आयले. निर्बंध ल्हव ल्हव सदळ जाल्ल्यान 2021 सावन पर्यटक येवपाक लागले. 2022 वर्सा जाल्यार बशी, रेल्वे, विमानां कोवीड पूर्व काळा प्रमाण सुरू जाली. देशी पर्यटकांचो आंकडो समाधानकारक आसा. विदेशी पर्यटक मात बऱ्याच प्रमाणांत उणें जाल्यात.
विदेशी पर्यटकांचो आंंकडो देंवलो
कोविडाच्या पयल्या वर्सा 2019 त 71.2 लाख देशी पर्यटकांनी भेट दिल्ली. 2022 वर्सा 70.1 लाख देशी पर्यटकांनी भेट दिल्या. हो आंकडो समाधानकारक आसा. अंदूं 2023 वर्सा देशी पर्यटकांचो आंकडो फाटल्या वर्सा परस वाडटलो, असो अदमास गोंय सरकारान उक्तायला.
2019 वर्सा राज्याक 9.37 लाख विदेशी पर्यटकांनी भेट दिल्ली. 2022 वर्सा 1.75 लाख विदेशी पर्यटकांनी भेट दिल्या. जुलय 2023 मेरेन 2.81 लाख विदेशी पर्यटकांनी भेट दिल्या. विदेशी पर्यटकांचो आंकडो बरोच उणो आसा.
देशी पर्यटकां परस विदेशी पर्यटक गोंयांत चड दीस रावतात. ते खर्च लेगीत चड करतात. विदेशी पर्यटकांचो आंकडो वाडलो जाल्यार निकेत्री हॉटेलां, टॅक्सी हांकां वेवसाय मेळटा. विदेशी पर्यटकांचो आंकडो उणो आशिल्ल्यान पर्यटन उद्देगान फावो त्या प्रमाणांत उबारी घेवंक ना. कोवीड पयलीच्या काळा सारकी सध्याची स्थिती ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
