भांगरभूंय | प्रतिनिधी
अॅपाचेर कॉल सेंटराची आसतली सुविधा
भांगरभूंय I प्रतिनिधी
पणजी : दर्यादेगो तशेंच पर्यटन थळांचेर चलपी बेकायदाे गजालींची म्हायती दिवपा सयत कागाळ करपा खातीर पर्यटन खातें ‘विजीलन्स अॅप’ कार्यान्वीत करतलें. डिसेंबरांत ह्या अॅपाची कार्यवाही जातली, अशें पर्यटन मंत्री रोहन खंवटे हांणी सांगलें.
बुधवारा घेतिल्ले पत्रकार परिशदेंत पर्यटनमंत्र्यान ‘विजीलन्स अॅप’ तशेंच हेर उपक्रमांची म्हायती दिली. दर्यादेगो तशेंच पर्यटन वाठारांत बऱ्योच बेकायदाे गजाली सुरू आसात. हांचेर कारवाये करपाक सरकारान दंडात्मक आदेश जारी केला. दंड फारीक केलो ना, जाल्यार पुलिसांक अटक करपाचे अधिकार दिल्यात. ह्या आदेशाची कार्यवाही सुरू जाल्या. बेकायदाे गजाली बंद जावच्यो म्हूण आतां विजीलन्स अॅप सुरू जातलें. ह्या अॅपाचेर कॉल सेंटर आसतलो. हॉटेलां तशेंच पर्यटन सेवांची म्हायती आसतली. पर्यटक तशेंच सामान्य नागरीक ह्या अॅपा वरवीं कागाळ नोंद करपाक शकतात. कागाळी नोंद करप सोंपें जावचें, हो अॅप सुरू करपा फाटलो हेत आसा.
पर्यटन थळां जतनाय कायदो 2001 वर्सा जालो. कारवायेचे मात पुलिसांक अधिकार नाशिल्ले. नेम तयार करून कारवायेचो आदेश जारी जाला. 5 हजार ते 50 हजार रुपयां मेरेन दंड जावप शक्य आसा. दंड फारीक केलो ना, जाल्यार अटक करपाचे अधिकार ह्या आदेशान पुलिसांक दिल्यात.
दर्यादेगांचेर सोऱ्याच्यो बाटल्यो फोडपाचे प्रकार वाडल्यात. सोऱ्याच्यो बाटल्यो कंपनींनी परत घेवपाक जाय. हे विशीं अबकारी खातें आनी पर्यटन खात्याच्या अधिकाऱ्यांची मुख्यमंत्री डॉ. प्रमोद सावंत हांचे फुडारपणा खाला बसका जातली.
सध्या रशिया आनी युकेचे पर्यटक गोंयांत येतात. पोलंड, जपान, युगोस्लोविया ह्या देशातले पर्यटक येवपाक जाय. तरेकवार देशांतल्या पर्यटकांक आकर्शीत करपाचे यत्न जातले.
विरोधकांक घेतले विस्वासांत
जेटी धोरणाचेर बऱ्योच सुचोवण्यो आयल्यात. ताचेर सरकार विचार करतले. कांय जाण विरोधा खातीर आनी प्रसिद्धी खातीर विरोध करतात. नव्या आमदारां कडल्यान ही आस्त नाशिल्ली, अशें पर्यटन मंत्री रोहन खंवटे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
