भांगरभूंय | प्रतिनिधी
भांगरभूंय । प्रतिनिधी
पणजीः फोन्तेनास आनी साओ तोमे वाठारांत पर्यटकांचो उपद्रव आनी पणजे शारांत धोकादायक इमारती मोडून उडोवपाचो विशय पणजे म्हापालिकेचे बसकेंत बरोच गाजलो. पर्यटकांचो उपद्रव आडावपाक फोन्तेनास वाठारांत पालिका निरिक्षक आनी कर्मचारी तैनात करप. तशेंच एल-दोरादो ही सिल केल्ली इमारत मोडून उडोवपाची प्रक्रिया चालीक लावप हे थाराव बसकेंत मांडले.
शुक्रारा दनपारा पणजे म्हापालिकेत बसका जाली. साबार विशय चर्चेक आयले. उपरांत महापौर रोहीत मोन्सेरात हांणी सविस्तर म्हायती दिली.
पणजे बाजारात एल दोरोदो ही इमारत मोडपाचो महत्वाचो मुद्दो बसकेत आयलो. ही पुराय इमारत सगळ्यांत धोकादायक आसा. हे इमारतीत राबीतो करपी आशिल्ले लोक पर्यायी सुवातीची मागणी करपा खातीर पालिकेच्या आयुक्तांक मेळिल्ले. पूण पालिकेन तांचे मागणेक न्हयकार दिला, अशें मोन्सेरात हांणी सांगलें.
फाटली कितलीशींच वर्सा जाली ही इमारत मोडकळेक पावल्या आनी इमारतीत रावपी लोकांची तशेंच इमारती सकयल चलपी लोकांचे सुरक्षेचे प्रश्न निर्माण जाला. इमारतीचे मदले भागात आनी बाजारांक तेकून काय पसरे आसात आनी आमी तांकां हे पसरे रिते करपाक सांगून इमारत मोडपाची प्रक्रिया चालिक लायतले, अशें मोन्सेरात हांणी म्हणलें.
फोन्तेन्हास आनी साओ तोमे वाठारांत पर्यटकांचे उपद्रवाचो विशय आयलो. हो उपद्रव बंद करपा खातीर आमी एक निरिक्षक काय पालिका कर्मचाऱ्यां सयत हे वाठारांत सासणा खातीर तैनात करतले. आमी पयली स्थिती कशी आसा ती पळयतले. जर सगळे बरे रितीन चलता जाल्यार आमी फुडे वतले. जर ही येवजण चलना जाल्यार दुसरो कितें पर्याय आसा हाचेर आमी विचार करतले, अशीं म्हायती मोन्सेरात हांणी दिली.
तशेंच डेंग्यूचे निवारण हो एक महत्वाचो मुद्दो आशिल्लो. काय वाठारांत डेंग्यूचे संक्रमण दिसून आयल्या देखून आमी भलायकी खात्याक पुराय सहाकार्य दिला. जर भलायकी खात्याक कसली गरज लागता तांचेनी आमका सांगत रावचे आनी आमी सदाच तयार आसात, अशें मोन्सेरात हांणी म्हणले.
कांपाल मैदानाचेर उदक सांठोवन जराळांची पैदास जाल्या आनी लागसाराच्या वाठारांत रावपी लोकांक त्रास जावपाक लागला. पूण हे मैदान खेळा खात्याकडे येता. एक उदकाची वाट कोनशांक आशिल्ली ती आमी नितळ केला. आमी खेळां खात्याचे अधिकाऱ्या वांगडा बसका घेवन हाचेर सासणा खातीरचो उपाय काडटले, अशीं म्हायती मोन्सेरात हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
