परिक्षा पास, अजून पळयता नोकरेची वाट

भांगरभूंय | प्रतिनिधी

सालांत

–

——-

फाटल्या कांय वर्सांत जायत्या सुवातींनी परिक्षा पास जावन लेगीत तरणाटे नोकरेची वाट पळयतात. आंध्र प्रदेशांत 4500 उमेदवारांनी जिल्लो निवड समितीची परिक्षा पास केल्ली. तांकां आतांच सरकारी नोकरी मेळ्ळ्या. कितल्या वर्सांनी? सुमार 24 वर्सां उपरांत. जायते कडेन परिक्षा वेळार जायनात. पाटण्यांतल्या जयप्रकाश नारायण विद्यापिठाच्या विद्यार्थ्यांक पदवी परिक्षे खातीर सुमार स वर्सां वाट पळोवची पडली. शिक्षकांचो उणाव, निदर्शनां, पगार दिवपाक कळाव, कोवीड हांणी तकली वयर काडली. ताका लागून विद्यार्थ्यांचो फुडार आडकलो. बिहारांतल्या जायत्या विद्यापिठांनी अशी परिस्थिती आसा. विद्यार्थ्यांक पदवी उसरां मेळटा आनी नोकरेची संद वता. प्लेसमेंटांत अडचणी येतात.

परिक्षे खातीर चड शुल्क घेवप हीय एक वेगळी वेदना. बेकार तरणाट्यां कडल्यान अर्ज स्वीकारतना जम्मू- काश्मीर राज्य भरती मंडळान 77 कोटी रुपया मेळयले. 1.3 लाख जाग्यांची भरती करपाची आशिल्ली. ते खातीर एक कोटी अर्ज आयले. परिक्षे खातीर तांकां एक हजार दीस वाट पळोवची पडली. जायत्या जाणांची पिराय वाडिल्ल्यान तांकां लश्करांत भरती करपाक मेळना, 2018 वर्सा केंद्रीय राखीव दळांत एक लाख हवालदार घेवपाचे आशिल्ले. 52 लाख अर्ज आयले. प्रत्यक्षांत 60,210 उमेदवार वेंचून काडले. अजून 4295 उमेदवार नोकरेची वाट पळयतात.

एकूणच देशांतले तरणाटे परिक्षा दितात, पूण पास जावन लेगीत नोकरी ना. जायत्या जाणांची वाट पळयले उपरांत नोकरेची पिराय सोंपली. कारण कांय जाग्यां खातीर थारावीक पिराय आसता. तशेंच अमूक वर्सां जालीं काय सरकारी नोकरी मेळना. जायत्या विद्यापिठांच्या परिक्षांक कळाव जाल्ल्यान पदवी घेवपाक कळाव जाता आनी अर्थांतच नोकरीची संद वता. हें सगलें खबर आसून लेगीत देशांतलीं सरकारां कितें करतात, हो प्रस्न सामान्य लोकांक पडटा.

लोकसंख्येची समस्या गंभीर जातली…!

एके खबरे प्रमाण संवसारांत चार मिनटांनी सुमार 1000 भुरगीं जल्माक येतात. हातूंतलीं सुमार १७२ भुरगीं भारतांत जल्माक येतात. संवसारांत सगळ्यांत चड प्रमाण भारतांत आसा. आयज चीन हो संवसारांतलो सगळ्यांत चड लोकसंख्या आशिल्लो देश, पूण थंय हजारांतलीं 103 भुरगीं आसात. हाचो अर्थ संवसारांतल्या पयल्या क्रमांकाच्या देशांत लेगीत नव्या जल्माचें प्रमाण आमच्या परस उणें आसा.

संवसार मतींत घेतल्यार भारत, चीन, नायजेरिया, पाकिस्तान, काँगो, इंडोनेशिया, अमेरिका आनी इथिओपिया हे देश संवसारांत 50 टक्के भुरगीं जल्माक येतात. भारत स्वतंत्र जालो तेन्ना भारताची लोकसंख्या सुमार 34 कोटी आशिल्ली, आयज ती सुमार 143 कोटी आसा. ही वाड खूबच चड आसा.

लोकसंख्या वाडपाचे जायते दुश्परिणाम जातात. हाका लागून अन्नधान्यांचो उणाव जातलो, पूण ताचे वांगडा भलायकी सुविधांचो उणाव, रावपाची सुवात उणी, शिक्षणीक सुविधांचो उणाव, साधनसुविधा आनी उर्जेचो उणाव आसतलो. लोकसंख्येक जाय आशिल्ली साधनसुविधा विपरीत प्रमाणांत आसल्यार गुन्यांव वाडटले, असो भंय आसा.

एक वटेन ही लोकसंख्या वाडपाची समस्या, तर दुसरे वटेन रशियेक उण्या लोकसंख्येची समस्या आसा. धा भुरग्यांक जल्म दिवन 10 दशलक्ष रशियन रूबल इनाम मेळोवपाची ऑफर दिल्या. चीनाच्या कांय राज्यांनीय परिस्थिती तशीच आसा. एकूणच एके वटेन लोकसंख्या वाडपाचें संकश्ट आनी दुसरे वटेन लोकसंख्या वाडोवपाची मोहीम… हातूंतल्यान संवसार कसो भायर सरतलो? आनी भारतांत थीर लोकसंख्या कशी दवरतलो? हे दोन प्रस्न म्हत्वाचे आसात.

– शांताराम वाघ

 96234 525 53