भांगरभूंय | प्रतिनिधी
पर्यटन मंत्री रोहन खंवटेः लोकांचो विरोध आसल्यार सरकाराची इत्सा ना
भांगरभूंय । प्रतिनिधी
पणजी : सुवात सोदून सनबर्न आयोजकांनी गरजेचे परवाने घेतले जाल्यार सनबर्न महोत्सवाक मान्यताय मेळटली, अशें पर्यटनमंत्री रोहन खंवटे हांणी सांगलां. सनबर्न महोत्सव दर वर्सा जाता. हाका लागून अंदूं लेगीत तो जावपाक हरकत ना, अशेंय तांणी सांगलें.
फाटलीं कितलींशींच वर्सां गोंयांत सनबर्न महोत्सव जाता. महोत्सवाक लागून पर्यटनाक उर्बा मेळटा जाल्यार महोत्सव जावपाक कसलीच हरकत ना. पूण लोकांचो विरोध आसतना सनबर्न महोत्सव थापपाची सरकाराची इत्सा ना. अंदूं आयोजकांनीच दक्षीण गोंयांत सनबर्न आयोजीत करपाचो प्रस्ताव दवरलो. या प्रस्तावाक लोकांनी विरोध केलो. हाचे उपरांत कामुर्लेचो प्रस्ताव फुडें आयलो. कामुर्लीच्या लोकांनी लेगीत सनबर्नाक विरोध केल्ल्यान महोत्सव संकश्टांत आयला. पांच म्हयन्यां पयलीं सनबर्न आयोजकांनी दक्षीण गोंयांत आयोजनाचो प्रस्ताव दवरलो. मात विरोधाक लागून सुवात निश्चीत करप तांकां शक्य जालें ना. आतां उत्तर गोंयांतूय विरोध जावपाक लागला. सनबर्न जावपाक सरकाराची कसलीच हरकत ना. आयोजकांनी पयली सुवात सोदची, गरजेचे परवाने घेवचे आनी उपरांत सरकाराक प्रस्ताव सादर करचो, अशें मंत्री खंवटे हांणी स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
