भांगरभूंय | प्रतिनिधी
चडशे तरणाटे फुडलें शिक्षण घेवपाक परदेशाक पसंती दितात आनी थंयचीं परिस्थिती पळोवन थंयच रावतात. सगले हुशार तरणाटे थंय स्थायीक जातकच, मागीर देशांत ब्रेन ड्रेन जावंपाक लागता. एखादो परदेशांत वचूंक सोदता ताका आमी आडावपाक शकनात, हें जरी खरें आसलें तरी ताची लेगीत कारणां सांगू येतात. पूण विद्यापीठ अनुदान आयोगान काय प्रस्न विचारांत घेवन एक निर्णय हालींच जाहीर केला. तो म्हळ्यार परदेशांतल्या विद्यापीठांक भारतांत तांचें काम करपाक केंद्रां सुरु करपाक परवानगी दिल्या. हातूंत संवसारिक पांवड्याचेर 500 उत्कृष्ट विद्यापीठांचो आसपाव आसा. कोरोनाक लागून ह स्थिती चड जाणवली आसूंक जाय. जें गंभीरपणान शिकपाक सोदतात तांकां अभ्यासू वातावरण जाय, जें तांकां परदेशान मेळटा तसेच आरक्षणा खातीर तांकां नोकरी मेळपाक अडचणी येता आसतल्यो. कारणां कितेंय आसूं आतां देशांतल्या विद्यापीठाक लेगीत सादूर रावचें पडटलें. कित्याक तर तांकां आतां स्पर्धक निर्माण जातलो.
आयोगान अटी घाल्याच आसतल्यो, पूण एक खरें तांची फी चड आसतली आनी जांकां परवडटा तेच विद्यार्थी ह्या विद्यापीठांक प्राधान्य दितले. जे प्रॉफेसर शिकयतले तांची निवड करपाक तांकां परवानगी आसतली आनी तशे ते दर्जो राखून दवरपाक प्रयत्न निश्चित करतले. आयचे तारखेक लागीं लागीं 18 लाख विद्यार्थी भायर शिकपाक गेल्यात. कोरोना तशेच युक्रेन -रशिया गेर्रा वेळार गोंयचे विद्यार्थी आसात हें सगळ्यांक कळ्ळें. आतां आयोगान निर्णय घेतलो म्हूण रोखडींच विद्यापिठां येवपाचीं नातय ताका एक- दोन वर्सां वतलीं. पूण प्रश्न आसा तो थळाव्या कॉलेजांचो. फक्त पदवी दिवपी कारखानो अशी तांची गत जाल्या काय कितें? हाका लागून फक्त बेरोजगारांच्या संख्येन वाड जावपाक जर लागली तर कॉलेजांनी खरेंच विचार करपाक जाय.
जायत्या कॉलेजांनी कंत्राटी पद्दतीचेर शिक्षक नेमल्यात, ते कायम जावंक नाशिल्ल्या कारणान ताचो परिणाम शिक्षण पद्दतीचेर जावं शकता, अशे खूब जाण खाजगींत सांगतात. तांचो शिक्षण दिवपाचेर परिणाम जावं शकता. खेरीज 18 सुवातो रिक्त आसात. म्हूण तर कॉलेजांचो दर्जो जसो आसपाक जाय तसो ना. अशें देशभर चित्र दिसता (काय आडवाद आसा ) म्हूण तर संवसारांतले वळेरींत पयल्या 200 मदीं आमची विद्यापीठां नात. सगळ्यांक खबर आसा की आमची कॉलेजां म्हळ्यार सर्टिफिकेट तशेंच बेरोजगारांची फौज निर्माण करपी कारखाने. आमच्या विद्यार्थ्यांक विशयांची म्हायती जरूर आसा, पूण ताचो वापर करपाक ते उणे पडटात. म्हूण तांकां प्रशिक्षणाचेर उद्देग वेवसायिकांक दुडू खर्च करचे पडटात. हालींच्या दिसांनी जर अशे तयार उमेदवार मेळटात तर तांकां प्राधान्य दितात. एके वाटेन अशी सर्त आसा तर आमकां काम करचें पडटा. थंय आळस पयस दवरचो पडटा. विद्यार्थी जावं पालक आपल्या फुडाराची खंत तांकां जरूर आसा. आतां पर्याय ना म्हूण विद्यार्थी अमक्या कॉलेजान थंय फाव त्यो सुविधा नासतना लेगीत येतात, हें प्रत्येकान समजूंक जाय. समजा जर कोणे सुविधा दिवपाची व्यवस्था केली तर विद्यार्थी आपयनासतना थंय वतले हें मतीन दवरचें. हरशी काळोख जावप वेगळें आनी मुद्दाम काळोख करप वेगळें. आतां हो काळोख पयस जावपाच्या मार्गार आसा. तेन्ना ज्यो शैक्षणिक संस्था आसात, तांणी जागें जावन योग्य तें शिक्षण दिवपाची तयारी करप हातूंत शाणपण आसा.
खंयचेय येवजणेक बरी, वायट बाजू आसता, तशी हे येवजणेक लेगीत आसा, पूण ही स्थिती कित्याक आयली? हांचें आत्मपरीक्षण आमी करपाक जाय.
बेरोजगारी वाडत आसा. कुशळटायेची मागणी वाडत आसा. जे नव्यान शिकतात तांकां घडये अडचण येवची ना, पूण जांचे कडेन हें ना ते नाराज आसतले, हातूंत दुबाव ना. एके वाटेन हें संकश्ट, तशें दुसरे वटेन बाकीचे नोकरेचेर दोळो दवरून आसात, हें संकश्ट. नवे पिळगेक नोकरी मेळूं शकता, अशें शिक्षण जाय. तें मेळना जाल्यार ते पर्याय सोदतले हातूंत दुबाव ना. खंयचेंय संकश्ट आमका एक संद दिता, हे नदरेन आयोगाच्या ह्या निर्णया कडेन आमी पळोवया.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
