परतून एकदां म्हादय

भांगरभूंय | प्रतिनिधी

कर्नाटकान म्हादय व्हेली वा फाल्यां दुदसागर व्हेलो आमकां खंय फरक पडटा? आमी वर्सुयभर फेस्तां, जात्रा आनी महोत्सव करीत बसुया.

सद्याक परतून एकदां सगल्यांक म्हादयची याद जाली. आरजी आंदोलन करूंक मुखार सरल्या. पयरूच तांणी दोना पावल निदर्शनां केलीं. काँग्रेसूय वातावरण तापोवचेले तयारेक लागल्या. आतां हातूंत काँग्रेस कितली जैतिवंत जातली तें पळोवचें पडटलें. आनी सरकार तर तळ्यांत मळ्यांत करतना दिसता. निमाणें म्हादयचें कितें जातलें काय? सरकार सगलें जाग्यार घालतलें म्हणून रावल्यार गोंय फटवतलें हें सांगूक खंयच्याच घाडी़-ज्योतिशाची गरज ना. म्हादयचो प्रस्न फाटलीं कितलिशींच वर्सां गाजत आसा. कोट्यांनी रुपया खर्च जायत आसा.
आतां हे पयशे सार्थकी लागतले काय? कारण सरकारची वागणूक पळेल्यार सरकार लोकांच्या दोळ्यांक उदक लायता काय दिसता. आमी कितें तरी केलें वा करतात म्हूण फक्त दाखयता. तेवटेन कर्नाटक म्हादयक कर्नाटकांत व्हरचे खातीर नाटकां करीत आसा. केन्ना केंद्रीय मंत्र्यांक गाराणें घालता तर केन्ना विधानसभेंत म्हादयचेर चर्चा करून अमके पयशे ह्या प्रकल्पाक दवरल्या म्हणपाची घोशणा करता. पर्यावरणाक कसलीच बादा जावची ना म्हणपाचें सांगून संबंदीत खात्या कडल्यान हरकत ना दाखले मागपाची तांची खटपट चालूच आसा. तेच वांगडा तांचीं लिपचोरयां कामांय सुरू आसात.
आमचें सरकार मात ह्या विशयाचेर गंभीर आशिल्लें दिसना. कर्नाटक इतलें कितें करता पूण आमचें सरकार तोंडार बोट दवरून चूप रावलां. फक्त ‘भियेवपाची गरज ना’ इतलेंच आयकूंक मेळटा. म्हादय कर्नाटकांत गेली जाल्यार पर्यावरणाचेर ताचे कितें परिणाम जातले हाचेर जायत्या तज्ञांनी आपणालीं मतां मांडल्यांत. कांय नामनेच्या संस्थांनी हाचेर अहवालूय तयार केल्यात. गोंयचेच न्ही जाल्यार कर्नाटकांतलेय पर्यावरणवादी लोक एकठांय येवन ह्या कर्नाटकाच्या प्रकल्पाक विरोध करूंक लागल्यात. ह्या प्रकल्पाचो मार फक्त गोंयाक न्हय जाल्यार कर्नाटकाकूय कसो बसूं येता हाचें प्रात्यक्षीक ते लोकां मुखार हाडूंक लागल्यात.
हें इतलें सगलें घडटा तरी कर्नाटक सरकार कशेंच फाटीं सरूंक तयार ना. तांकां म्हादयचें उदक जाय म्हणजे जायच. कर्नाटकाचें एक बरें आसता. सरकार कोणाचेंय आसूं, विरोधांत कोणूय आसूं. तांचे मदल्यान उजो वचनासूं पूण असले प्रस्न येतात तेन्ना ते संपूर्णपणान एकठांय येतात. हांगा ते फक्त राज्याचो विचार करतात आनी आमी कितें तर आपापल्या पक्षाचो विचार करतात. सगल्यांचीं तोंडां वेगळे दिकेक. आरजी चे लोक निदर्शनां करतात जाल्यार काँग्रेस आनी हेर पक्ष तांकां तेंको दिवचे नात. तांची चूल वेगळी हांची वेगळी. मागीर प्रस्न कितलोय गंभीर आसूं आमी एकठांय येवचे नात. हाचो लाव कर्नाटक कसो घेवचे नात?
तशें फाटलीं कांय वर्सां म्हदयच्या नांवान बोवाळ चलिल्लोच. म्हादय कांय वर्सां आदींच तिणयां गेल्ली. पूण सगल्यांनीच कानार केंस काडिल्ले. वेंचणूक लागीं येता तशी सगल्यांक म्हादयची याद जाता. कसलो तरी विशय जाय आसता न्ही. मतां खातीर राजकारण्यांक कसलीं तरी फितृकां करचींच पडटात. मतां मेळोवंक जाय न्ही. म्हणटकूच तांचें देशप्रेम, राज्यांतल्या लोकां वेलें प्रेम सामकें उफाळून म्हणटात तशें वयर येता. मागीर तांकां कोण उपाशी आसात, कोण तानेल्ले आसात म्हणपाचें येवजता आनी तांच्या मोगान हे राजकारणी जायतें कितें करतात.
सद्याक काय वेंचणुको लागीं नात. तरी आसतना म्हादयचो प्रस्न मुखार आयला. गोंयचे एके नामनेचे संस्थेतल्या तीन विज्ञानिकांनी म्हादयचेर एक अहवाल तयार केला. अहवालांत तांणी मांडिल्ल्या मता प्रमाण म्हादय कर्नाटकान व्हेली जाल्यार गोंयचेर ताचो व्हडलोसो परिणाम जावचो ना. आतां ह्या विज्ञानिकांनी हो अहवाल कित्याक म्हणून तयार केलो काय? म्हादयचो प्रस्न आतांच तयार जावंक ना. फाटलीं जायतीं वर्सां सर्वोच्च न्यायालयांत हाचेर वाद चल्ला. मागीर हे संस्थेक आतांच कित्याक हो अहवाल करीन दिसलो? आनी हेर तज्ञ सांगतात वा हेर संस्थांनी जे अहवाल केल्यात ते सगले पिशे जाले तर? काय ह्या अहवाला फाटल्यान आनीक कसलो खेळ आसा? वयल्यान खंयच्यान तांकां तसो आदेश बी येवंक ना न्ही? हो अहवाल आयलो आनी गोंयांत बोवाळ सुरू जालो. विरोधक आपले परीन विरोध करतात पूण आमचें सरकार अजून सुस्त आसा. आमचें अभ्यासू सरकार हाचेर अभ्यास करतलें आनी मागिरूच ‘भियेवपाची गरज ना’ म्हूण सांगूंक तोंड उगडटलें. तितल्यान कर्नाटक हाचो फायदो घेवन आपणालें नाटक मुखार व्हरतलें.
खरें म्हणल्यार अहवाल येना फुडेंच ह्या विज्ञानिकां कडेन भासाभास करून ह्या अहवालाची सत्यताय पळोवंक जाय आसली. तांणी खंयच्या आधाराचेर हो अहवाल तयार केला तें जाणून घेवंक जाय आसलें. सरकार आनी विरोधक एकठांय येवन तांणी केंद्राची भेट घेवंक जाय आसली. जाता तितले बेगीन ह्या प्रस्नाचो विलो लावंक जाय आसलो. आनी हे खातीर गोंयचे जनतेन मुखार सरून सगल्या पक्षांचेर दबाव हाडूंक जाय आसलो. पूण आमी गोंयकार सुसेगाद. कितें जाता तें पळोवपाचें. आसा न्ही सरकार तेंय डबल इंजीन. करतलें, घालतलें
सगलें जाग्यार.
कर्नाटकान म्हादय व्हेली वा फाल्यां दुदसागर व्हेलो आमकां खंय फरक पडटा? आमी वर्सुयभर फेस्तां, जात्रा आनी महोत्सव करीत बसुया. गोंयकारांक जर खऱ्यांनीच म्हादयचें म्हत्व कळिल्लें आनी म्हादय वचपाचें दुख्ख जाल्लें जाल्यार गोंयकार गोंयभर सुतक पाळपाचे. हेंच जर कर्नाटका बाबतींत घडिल्लें जाल्यार येन्ना म्हणल्यार कितले तरी शेतकार त्याच उदकांत उडी मारून जीव दिवपाचे. जेन्ना जेन्ना कावेरी न्हंयच्या उदकाचो प्रस्न उप्रासला तेन्ना कितें जालां आनी सरकारचेर कसो दबाव आयला तें सोदून पळेयात. गोंयांत अशें कितें घडलां वा घडटलें? केन्नाच ना.

अभयकुमार वेलींगकार
9423884687