भांगरभूंय | प्रतिनिधी
मडगांवां जिल्हो पांवड्याचेर गोंय मुक्ती दीस मनयलो
मडगांव: स्वातंत्र्य सैनिकांच्या त्यागाचो उगडास करून परकी राजवटींतल्यान मेळयल्लें स्वातंत्र्य आमी सांबाळून दवरपाची गरज आसा. मुख्यमंत्री डॉ. प्रमोद सावंत हांच्या फुडारपणा खाला राज्यांत उदरगतीचे दीस आयल्यात. पूण हाचो अर्थ असो न्हय 1961 उपरांत उदरगत जावंक ना. गोंयांक स्वातंत्र्य मेळ्ळें तेन्ना सावन तें आतां मेरेनच्या दरेका सरकारान राज्याचे उदरगती खातीर विवीध मळांचेर योगदान दिलां. डॉ.सावंत हांच्या सक्षम नेतृत्वाखाला हें सरकार राज्याक उदरगतीचे विंगड विंगड दिकेन फुडें घेवन वचत आसा. तरी आमी सगळ्यांनी एकवटान यत्न करून राज्याक उदरगतीची तेंगशेर व्हरपाक यत्न करपाक जाय, अशें भौशीक बांदकाम मंत्री निलेश काब्राल हांणी सांगलें.
मडगांवच्या माथानी साल्दाना प्रशासकीय संकुलांत आयोजीत 62 व्या गोंय मुक्ती दीस सुवाळ्यांत राष्ट्रीय तिरंगो हुबयल्या उपरांत मंत्री काब्राल उलयताले.
मंत्री काब्राल हांकां सुवाळ्याच्या थळार जिल्होधिकारी ज्योती कुमारी आनी पुलीस अधीक्षक गुरुदास गावडे हांणी येवकार दिलो.
भारत देश ह्या वेळार जी20 शिखर परिशदेचें आयोजन करता आनी देशांतल्या दरेका नागरिकां खातीर ही अभिमानाची गजाल. देशाचो नागरीक म्हणून देशाचे उदरगती खातीर दरेका मनशाची भुमिका म्हत्वाची. आमी आमची भुमिका बरे तरेन करपाक जाय. दुसर्याक दोश दिवचो न्हय. जर आमी स्वता जावन थारायलें जाल्यार आमी आमचे प्रस्न सहज सोडोवपाक शकतले. भारत हो खुशालकायेन जगपा खातीर एक म्हान देश आसा. समाजांतल्या दरेका मनशान जात, पंथ आनी धर्माचो विचार करिनासतना राज्य आनी देशाचे उदरगती खातीर वावुरचें, अशें मंत्री निलेश काब्राल हांणी सांगलें.
ह्या वेळार काब्राल हांणी पुलीस, गृहरक्षक, उजो पालोवपी दळ, गोंय मानव संसाधन विकास म्हामंडळाचे सुरक्षा दळ आनी दामोदर म्हाविद्यालय, मडगांव, जवाहर नवोदय विद्यालय, काणकोण; युनियन हायस्कूल, सांगें, सेंट तेरेझा हायस्कूल, राय; म्युनिसिपल हायस्कूल, वास्को, गार्डियन एंजेल हायस्कूल, कुडचडें, एमआयबीके हायस्कूल, खांडेपारच्या विद्यार्थ्यांच्या संचलनाची पळोवणी करून मानवंदना दिली.
आमदार आलेक्स सिक्वेरा, आलेक्स रेजिनाल्ड लोरेन्स, उल्हास तुयेकर, अतिरिक्त जिल्होधिकारी परेश फळदेसाय, हेर वरिश्ठ सरकारी अधिकारी, स्वातंत्र्य सैनीक आनी विद्यार्थी सुवाळ्याक हाजीर आशिल्ले. अनिल पै हांणी सुवाळ्याचें सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
