भांगरभूंय | प्रतिनिधी
फुकट उदकाचो गैरफायदो घेतिल्ल्यान येवजण बंदू -मुख्यमंत्री सावंत हांचें स्पश्टकरणपणजीः फुकट उदक दिवपाचे येवजणेचो कांय जाणांनी गैर फायदो घेवन चार-चार मीटर लायले. उदकाची व्हडा प्रमाणात नाशाडी जाल्ले कारणान ही येवजण बंद केली. सरकार दर क्युबीक मीटर फाटल्यान 20 रुपया खर्च करून प्रक्रिया केल्ल्या उदकाची पुरवण करता आनी गोंयकारां कडल्यान फक्त 4 रुपया घेता, अशें मुख्यमंत्री डॉ. प्रमोद सावंत हांणी सांगलें.
मुख्यमंत्री डॉ. प्रमोद सावंत हस्तुकीं हर घर जल हे संकल्पने वरवीं 21 कोटी खर्चून आगशें उदका पुरवणेची सुविधा आनी नावशी उदकाचे टांकयेचें उक्तावण जालें. आगशेंच्या इगर्जेच्या सालांत जाल्ल्या सुवाळ्यांत थळावे आमदार विरेश बोरकार, पियेवपाचे उदकाच्या खात्याचे मुखेली सुहास बेळगांवकार आनी हेर अधिकारी हजर आसले.
ह्या वेळार उलयतना मुख्यमंत्र्यान सांगलें, नळाच्या उदकाची 40 टक्के नाशाडी जाता आनी ती 20 टक्क्याचेर हाडपाचो आमचो यत्न चल्ला.
फुकट उदक दिवपाक सुरूवात केल्ली तेन्ना 4-4 मीटर लावन ताचो दुरूपयोग करतना नदरेक आयले. उदक ही गरज भागोवपा खातीर आसा तांचो वापर गाडी धुंवपाक वा झाडांक उदक घालपा खातीर करचो न्हय. पूण ही उदकाची गरजे भायर नाशाडी जावपाक लागली म्हूण ही येवजण बंद उडयली, अशें मुख्यमंत्र्यांनी स्पश्ट केले.
सरकार दर क्युबीक मीटर उदका फाटल्यान रु. 16 इतले लुकसाण सोंसून गोंयकारांक उदकाची पुरवण करता. धरणांतल्यान कच्चे उदक हाडून ताचेर प्रक्रिया करून त्या उदकाची नळा वरवीं पुरवण करपा खातीर सरकार दर क्युबीक मिटरा फाटल्यान 20 रुपया खर्च करता. पूण ह्या उदका फाटल्यान सरकारा गोंयकारा कडल्यान फकत 4 रुपया घेता, अशीं म्हायती मुख्यमंत्र्यांनी दिली.
‘हर घर जल’ उपरांत आतां ‘हर घर फायबर’ ही येवजण पावयतले. दरेकल्याच्या घरांत फायबर वरवीं इंटरनॅट पावचे हे खातीर आमी काम करतात. 12 वी उपरांत फुडले शिक्षण घेवपी विद्यार्थांक मजत जावची हे खातीर तशेंच फुडाराक ‘वर्क फ्राम होम’ हे संकल्पने वरवीं आमचे भुरगे घरा बसून भायल्या देशां खातीर काम करचे ही आमी मोख दवरल्या, अशें सावंत हांणी सांगलें.
वर्स 2047 त भारताक स्वतंत्र जावन 100 वर्सा पुराय जातात. हे वर्स सोंपचे पयलीं भारत हे विकसीत राष्ट्र करपाची मोख पंतप्रधान नरेंद्र मोदी हांणी दवरल्या. 25 वर्सा भितर आमकां गोंय आनी देश हे विकसीत करपाचे नरेंद्र मोदी हांचें ध्येय मुखार दवरून आमी वावुरतात, अशें मुख्यमंत्री सावंत हांणी म्हणलें.
गोंयांतल्या सामान्य लोकांक थाकाय दिवपा खातीर राज्य सरकारान 1 सप्टेबर 2021 त 16 हजार लिटर मेरेन फुकट उदक दिवपाची येवजण जाहीर केल्ली. फाटल्या 4 वर्सात 24 टक्के गोंयकारांनी हे येवजणेचो लाव घेतिल्लो. पूण 1 मे 2025 त सरकारान ही येवजण अचकीत बंद केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
