भांगरभूंय | प्रतिनिधी
दोन रशियन चार्टर्ड विमानां देंवली मोपा मनोहर आंतरराष्ट्रीय विमानतळाचेर
पेडणें ः पर्यटन हंगाम सुरू जावचे पयलीं पर्यटनाची मजा घेवपा खातीर मोपा मनोहर आंतरराष्ट्रीय विमानतळार दोन रशियन चार्टर्ड विमानांतल्यान वट्ट 349 विदेशी पर्यटक आयलें. पयलें विमान णव वरांचेर देंवलें. तातूंत 210 जाल्यार दुसऱ्या विमानांतल्यान 139 विदेशी पर्यटक मेळून वट्ट 349 विदेशी पर्यटक गोंयांत पावलें.
पर्यटकांक येवकार आनी पर्यटन वाडोवपाचेर भरः मंत्री रोहन खंवटे
पर्यटकांक येवकार दितना पर्यटन मंत्री रोहन खंवटे हांणी पर्यटकांक सगल्या तरेच्यो सुविधा दिवपाचो यत्न करतले तशेंच दरेकां पर्यटकाची सुरक्षीतताय म्हत्वाची आसा अशें सांगलें. देखून पर्यटकांक कसले त्रास आसा, खंयचे गजालीचो उणाव आसा हें जाणून घेवन तांच्यो समस्या सोवपाचो यत्न करतलें. जाका लागून तांका गोंय पर्यटनाचो पुराय आनंद घेवपाक मेळटलो. तशेंच गोंयच्या पर्यटनाची वाड जातली. ते खातीर आयिल्ल्या पर्यटकांक हांव येवकार दिवन तांच्या सोयी सुविधाची पुराय जतनाय घेतलें. तेच वेळार गोंयांत पर्यटन वाडोवपाचेर भर दितले अशें पर्यटन मंत्री रोहन खंवटे हांणी सांगलें.
पर्यटकांक येवकार…
मोपा आंतरराष्ट्रीय विमानतळार चार्टर्ड विमानांतल्यान आयिल्ल्या पर्यटकांक येवकार दिलो. तेन्ना कांय जाणांनी आमचे भारतीय संस्कृतायेतले लोकनाच सादर केले. देखून कांय पर्यटकांनी हे भारतीय संस्कृतायेची तोखणाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
