पयल्या दिसा गोंयचो शेक

भांगरभूंय | प्रतिनिधी

सुयश प्रभुदेसायान डावाची सुरवात करपाक येवन नोंदयिल्ल्या नाबाद शेंकड्याच्या नेटार येजमान गोंय पंगडान चार दिसांचे रणजी लडतीच्या पयल्या दिसाचे अखेर मेरेन चंदीगडा आड 3 विकेटी वगडावन 267 धांवड्यो करून आपली स्थिती घटमूट केली.

काल सावन जीसीएच्या पर्वरी क्रिकेट अकादमीच्या मैदानाचेर मॅचीक सुरवात जाली. सुयशान 240 बॉलांनी 12 चवके आनी एक सक्याचे मजतीन नाबाद 124 धांवड्यो केल्यो, तशेंच ताणें दुसरे विकेटी खातीर के व्ही सिद्धार्था वांगडा 292 बॉलांनी केल्ले 149 धांवड्यांचे भागिदारीक लागून गोंयाक पयल्या दिसा आपलो शेक दवरपाक मजत मेळ्ळी. सिद्धार्थान 159 बॉलांनी 9 चवक्यांचे मजतीन 77 धांवड्यो केल्यो.

ते पयलीं सकाळीं गोंयान टॉस जिखून पयलीं बॅटींग करपाचो निर्णय घेतलो. हे मॅची खातीर गोंयान एक बदल करतना मंथन खुटकाराचे सुवातेर इशान गडेकाराक संद दिली.

इशानान सुयशा वांगडा मेळून पयले विकेटी खातीर 79 धांवड्यांची भागिदारी केली. इशान 80 बॉलांनी 45 धांवड्यो करून बाद जालो. ताणें स चवके आनी एक सको मारलो. ताका अर्पित सिंगान बोल्ड केलो. ते उपरांत सुयश आनी सिद्धार्थाची जोडी जमली. त्रिपुरा आडचे फाटले मॅचींत शेंकड्याची नोंद करपी सिद्धार्थ हे मॅचींत लेगीत शेंकडो मारतलो अशें दिशिल्लें. पूण, तो वैयक्तीक 77 धांवड्यांचेर बाद जालो. ताका राजांगड बावान बाद केलो. मजगतीं, सुयशान पयले श्रेणींतलो आपलो तिसरो शेंकडो पुर्ण केलो.

के व्ही सिद्धार्थ बाद जाल्या उपरांत स्नेहल कवठणकार लेगीत चड वगत खेळपट्टीचेर तग धरपाक शकलो ना. तो फकत स धांवड्यो करून जगजीत सिंग संधूच्या बॉलाचेर अर्सलान खानाक कॅच दिवन तंबूंत परतलो. पयल्या दिसाचो खेळ सोंपलो त्या वेळार राहुल त्रिपाठी 12 धांवड्यांचेर खेळटालो.

चंदीगडा वतीन जगतीत सिंग संधू, राजांगड बावा आनी अर्पित सिंग हांकां एकेक विकेट फावो जाली.

धांवतकटोः गोंय (पयलो डाव) 90 ओव्हरींनी 3 बाद 267 धांवड्यो (इशान गडेकार बो. बॉ. अर्पित सिंग 45, सुयश प्रभुदेसाय खेळटा 124, के व्ही सिद्धार्थ कॅ. संदीप शर्मा बॉ. राजांगड बावा 77, स्नेहल कवठणकार कॅ. अर्सलान खान बॉ. जगतीत सिंग संधू 6, राहुल त्रिपाठी खेळटा 12, अतिरिक्त धांवड्यो 3.

बॉलींगः संदीप शर्मा 20-7-48-0, जगजीत सिंग संधू 19.3-7-48-1, राजांगड बावा 13-2-36-1, अर्पित सिंग 16-2-68-1, मुरुगन आश्विन 20.3-2-62-0, अर्सलान खान 1-0-5-0.