भांगरभूंय | प्रतिनिधी
वाचले तर वाचले. सकाळच्यान दोन फावट तरी ताणें म्हणिल्लें आयकूंक आयलें. तो कोविडाचेर उलयता काय म्हारगायेचेर तें कळ्ळें ना. केन्ना कोवीड मारता तर केन्ना म्हारगाय. जीएसटी वाडयत सावन कोवीड परवडलो, पूण ही म्हारगाय न्ही, अशें दिसूंक लागलां. हांतल्यान वाचले तर वाचले अशेंच म्हणटा आसतलो तो असो म्हजो समज. पूण ताचेच कडल्यान कळ्ळें ताणें आमच्या संस्कृती मंत्र्याचें उलोवप आयकलें. मंत्री खंय सांगतालो वाचले तर वाचले म्हणून. आतां हांसप काय कितें तेंच कळना जालें. मंत्र्यान म्हणिल्लें, ‘वाचाल तर वाचाल.’ आनी ह्या सभाग्यान ताचो अनर्थ केल्लो. ताचीय चूक नाशिल्ली. वाचिल्लें तर कळपाचें ताका. तशें आमच्या मंत्र्याचें वाचप खूब हातूंत दुबाव ना. ताणें इतिहास वाचला, ताजमहाल ते कला अकादमी मेरेनचो इतिहास. ताणे साहित्य वाचलां, ताका कविता पाठ. नाटक तर वाचचेंच पडटा. म्हणुनूच तर तो खंयच्याय प्रश्नाची जाप दितना सुभाशीत सांगून सुरवात करता आनी कवितेन सोंपयता. सगळें कशें नाट्यमय. जाप आयकून प्रश्न विचारपी सोंपुकूच जाय. आपूण कला अकादमीच्या टेंडराचेर उलयतालों काय ताजमहालाच्या तेंच बाबड्याक कळचें ना.
आसूं, आमी इल्ले वाचाळ. वाचाल आनी वाचाळ दोन वेगळीं उतरां हें आमी चड वाचलें ना तरी जाणात. जो वाचता तो वांचता हें खरें मानुंकूच जाय. संस्कृती मंत्र्यान लोकांच्या मनांतलें वाचलें आनी अळंग वेगळ्याच पक्षांत उडी मारली. म्हणून तर वांचलो तो. ताणें लोकांचें मन वाचूंक नासलें तर वाचपाचो तर? म्हणटकूच वाचन कितलें गरजेचें तें पळेयात. पूण आमी वाचतले जाल्यार आमचे कडेन वाचनालयां आसूंक जाय न्ही? आमचीं वाचनालयां कशीं आसात तें सगळ्यांक खबर आसा. वाचनालयांनी कोणूय वता तो फकत वर्तमानपत्रां वाचूंक. बाकी पुस्तकां बी आरमारिंनी बंदिस्त आसा तें पळोवन समाधान मानपाचें. पुस्तकां कोणेय वाचूंक व्हेल्यार बरे तरेन परत मेळटलीं हाची शास्वती खंय उणी. हें हांव सांगना, वाचनालयांनी वतकूच कळटा. सेंट्रल लायब्ररींत लेगीत पुस्तकां नाच जाल्यांत म्हणपाचें आयकूंक मेळटा. मागीर हेर कडेन कितें आसतली दशा तें सांगूक जाय?
पणजेच्या गोवा कोंकणी अकादेमीच्या वाचनालयाची दशा सद्याक फेसबुकार दिश्टी पडटा. बाबडीं पुस्तकां रस्ताद कशीं पडल्यांत, पूण कोणूय जाय म्हणून गेल्यार ताका मेळप कठीण. आनी हे म्हणटात वाचाल तर वाचाल. हांगा हीं पुस्तकां वांचतलीं काय कितें तेंच कळना. आमचे मंत्री म्हणटात वाचनालयां आसलीं म्हूण जायना, तांचो सारको उपयोग जावंक जाय. पूण उपयोग जातलो जाल्यार वाचनालयां सारकीं बरीं आसूंक जाय न्ही? कांय शिकपी भुरगे पुस्तकां सोदतात पूण वाचनालयांनी तांकां पुस्तकां मेळनात. म्हजें फट जाल्यार गोंय युनिव्हर्सिटीच्या भुरग्यांक विचारूं येता. करतात बाबडीं केन्नाय फोन, अमकें पुस्तक कोणा कडेन मेळत काय म्हणून.
पर्येंचीं भुरगीं वाचनालय ना जाल्यार भोंवतें वाचनालय तरी दियात म्हूण मागतात. तांचो आमदार विधानसभेंत तशी मागणी करता पूण सरकारा कडेन दितां म्हणूंक जायना. ना जाल्यार खंयच्यान दितले? आनी हांगा कोंकणी अकादेमीक खासदार कोट्यांतल्यान मेळिल्लें भोंवतें वाचनालय कळमेवन पडलां. कोणाक ताचें पडून गेल्लें ना. तें वाचनालय काय आतां वांचतशें दिसना. खासदार कोटा जालो म्हणून कितें ते पयशे वयल्यान पडटात व्हय? आमचेच पयशे न्ही ते? सरकार कित्याक ताचो ताबो घेना? दियात न्ही मागता तांकां एक भोंवतें वाचनालय. वाचल्यार वाचलें, भोंवतें वाचनालयूय वांचतलें आनी वाचपीय. नासल्यार हें एक स्मारक म्हणून जाहीर करात. पर्यटक तरी पळोवंक येतले. जंय व्हड-व्हड कवी, साहित्यीक वांगडी म्हणून बसल्यात त्या मंडळाक आपलीं वाचनालयां वांचोवंक कळनात तर सामान्य वाचतले कितें आनी वांचतले कशे? काय साहित्यिकांक वाचूंक नाका? तांकां वाचपाचें म्हत्व दिसना? तें फकत मंत्र्याकूच कळटा? मंत्र्यान वाचाल तर वाचाल म्हणून सुभाशितां सांगचे परस आनी विधानसभेंत कविता वाचचे परस हीं वाचनालयां जाग्यार कशीं घालूंक येता तें पळेल्यार उपकार जायत. राजपाटणाच्या मुखेल बसस्टँडाक लागीं आशिल्लें हें वाचनालय खूब जाणांक सोयिस्कर जातलें. तशेंच हांगा कळमेत पडिल्लें भोंवतें वाचनालय जंय वाचनालयाची गरज आसा त्या वाठारांत धाडचें. वाचपाची भूक आशिल्ल्यांक उपयोगाक येतलें. सरकारान हातूंत बेगीन लक्ष घालचें.
कांय दीस आदीं मालवणांत जाल्ल्या कोंकणी परिशदेंत मुख्यमंत्र्यान कोंकणीकa सगळें कितें दिवपाचें उतर दिल्लें. सरकार एकेवटेन सगळे तरेची मदत करतले म्हूण सांगता आनी हेवटेन चित्र मात वेगळेंच दिसता. जें कितें उतर दिल्लें तें फकत ताळयो घेवचे पुरतेंच काय अशें दिसले बगर रावना. आनी मागीर प्रश्न पडटा अश्या सरकाराक पातयेवप तरी कशें? काय सगळी ‘बोलाचीच कढी बोलाचाच भात’ बी! सरकार जेन्ना सोशल मिडियाचेर येवपी खबरो मानून पुर्तुगेजांनी मोडिल्ल्या देवळांची जर यादी तयार करूंक पळेता तर त्याच सोशल मिडियाचेर येवपी खबरांच्या आधाराचेर सरकारान गोवा कोंकणी अकादेमीच्यो अडचणी पयस करूंक कित्याक मुखार येवचें न्ही? गोवा कोंकणी अकादेमी ही एक सरकारी संस्था. सरकाराचें ताचेर सारकें बरें लक्ष आसूंक जाय. थंय कितें जाय-नाका तें सरकार न्ही तर कोण पळेतलो? सरकाराचें कर्तव्य तें. घडये थंयचे वांगडी उणे पडले आसूं येता. तांकां मागूंक कळ्ळें ना जायत. पूण जेन्ना सोशल मिडियावेल्यान हांगच्यो उणिवो वार्यार वतात तेन्ना सरकारान थंय नदर मारुंकूच जाय. नासल्यार कोण आयकतलो तुमचें वाचाल तर वाचाल?
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.