भांगरभूंय | प्रतिनिधी
भटसराचे आमच्या सगळ्यांचेर आशिर्वाद आसतलेच. परत जल्म मेळ्ळो जाल्यार विज्ञानाचें मुळावण घट जावपाक आमकां भटसर गुरू म्हणून लाभूं, अशें मागतां.
हांव 5 जूनाक सांजवेळार घरा कडेन संगणकाचेर काम करतालों. इतल्यान चलयेचो, चैत्रालो जर्मनीच्यान फोन आयलो “पप्पा भटसर गेलो, शौमिकान आमच्या जांबावले नाटकाच्या व्हाॅटसअॅप ग्रुपाचेर घालां, पळय.” फोनार पळयल्यार आयलां.
पयलीं तेपावेलें गुरू-शिष्याचे नातें जें आतां दुर्मीळ जालां ताची प्रचिती आयली. योगायोग कसो जालो ताचें अजाप जालें, हांव सराक इतलों लागीं फातोड्ड्यां रावतां आनी सर भायर पडलो ही खबर परदेशांतल्यान समजप म्हणल्यार, म्हाका दिसता आमच्या गुरू- शिष्याच्या नात्या भितर म्हजें कुटूंब केन्ना सामील जालें तें म्हाकाच कळ्ळें ना.
आमीं मराठी प्राथमीक शाळा सोंपोवन 1975 सालांत इंग्लीश माध्यमांत यत्ता पांचवेंक दामोदर शाळेंत गेले तेन्ना राघवेंद्र भट गांवकार सर आमकां रसायनशास्त्र म्हणल्यार “केमिस्ट्री” आनी जीवशास्त्र म्हणल्यार “बायोलाॅजी” शिकयताले. जरी माध्यम इंग्लीश आसलें तरी आमकां तिची सवकळ नाशिल्ली. कारण इंग्लीश अक्षरां आमी यत्ता पांचवेंक वचपा पयलींच्या सुटयेंत शिकिल्ले. भटसराक आमची आडखळ खबर आशिल्ले कारणान आमकां गरज आसा तशें शिकोवन आमचें शिकप तांणी सोंपें केल्लें. ताकाच लागून आमकां आज विज्ञानाचे ज्ञान चड बरें तरेन समजलें.
पयलींचे गुरू फक्त आपलो विशय शिकोवन ओगी रावनासले, तर तें हेर गजालींनीय लक्ष घालताले. म्हाका याद जाता,आमच्या वर्सुकी स्नेह- संमेलना वेळार बाकीच्या टिचरां बाराबर भटसरालोय वांटो खुब मोठो आशिल्लो. तशें पळोवंक गेल्यार काणकोण म्हाल, ज्या वाठारांतल्यान भटसर मडगावां शिकोवपाक आयिल्ले त्या वाठाराचेर तेन्ना मराठीचो प्रभाव आशिल्लो. तरी भटसरान आमच्या स्नेह- संमेलनात रामायणाचेर कोंकणींत एक संगितीका बरोवन बसयिल्ली. म्हाका याद जाता रामायणांत सीतेक राम आपले बाराबर रानांत येवंनाका म्हणून समजायता, पूण सीता ताका कशीच बदना. उतरां याद जातात तीं राम सीतेक सांगता, “नाका येवूं सीते तुं वनांत, वाग शिंवाची हुयेली आयकून तुं भियेतली” त्या उतराक सीता सांगता, “तुका पळोवन म्हजी भिरांत शेणटली,”……..
खेळा मळारय तांचें योगदान आनी आवड आसली, आमी 1979 त णववेक आसतना भटसर आनी एक सर क्रिकेट टेस्ट मॅच पळोवपाक बेंगळुरू / मद्रास गेल्ले, तेन्ना गोंयांत टेलिवीजन येवूंक नाशिल्ले. एका धावेच्या भुरग्यान निरोप समारंभाक विचारलें, सगळें शिकोवन सोंपोवचे पयलींच निरोप कसलो दितात, असो प्रश्न विचारलो. तो भटसराच्या मनाक खूब लागलो आनी तांणी शिकोवपाचे नोकरेचो राजिनामो दिलो. ताचीं फळां आमकां धावेक पावतकच भोगचीं पडलीं. तांचें बरें मार्गदर्शन आमकां गरजे वेळार धावेक मेळ्ळेंना ही खंत अजूनय जाता.
शिक्षण सोंपोवन आमी पोटा-पाण्याक लागतकच भटसर खंयय मेळटालो तेन्ना म्ह्जे सयत म्हज्या कुटूंबाची खबर घेतालो. ते आपुलकेन म्हज्या आंगार मांस कांकणभर चड जातालें.
भटसराचे आमच्या सगळ्यांचेर आशिर्वाद आसतलेच. परत जल्म मेळ्ळो जाल्यार विज्ञानाचें मुळावण घट जावपाक आमकां भटसर गुरू म्हणून लाभूं, अशें मागतां. भटसराक मनां- काळजांतल्यान आर्गां ओपतां.
महेश पै फोंडेकार
88052 75365
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
