भांगरभूंय | प्रतिनिधी
नितीन गडकरी : जुवारी पुलाचेर ट्वीन टॉवराक बुन्याद
भांगरभूंय । प्रतिनिधी
वास्कोः पत्रादेवी हुंपून गोंयांतल्यान जावपी येरादारी उणी करपा खातीर 12 ते 15 हजार कोटी रुपया खर्च करून गोंय-बंगळुरू रिंग रोड बांदपाची येवजण आसा. हे विशीं अभ्यास चालू आसा. हो म्हामार्ग पुराय जातकच गोंयांतल्या रस्त्यांचे प्रस्न सुटावे जातले. केंद्रीय रस्तो येरादारी आनी म्हामार्ग मंत्री नितीन गडकरी हांणी स्पश्ट केलें. येरादारीचे त्रास आनी अपघात उणे करपा खातीर रस्त्यांचें जाळें बांदपाचें काम सुरू आसा अशें तांणी सांगलें.
कुठ्ठाळींतल्या नव्या जुवारी पुलाचेर ऑब्झर्व्हेटरी टॉवर्स आनी व्ह्युवींग गॅलरी प्रकल्पांच्या कामाच्या बुन्याद घालपाच्या सुवाळ्यांत मंत्री गडकरी उलयताले. चिखली पंचायत सभाघरांत ही कार्यावळ आयोजीत केल्ली. ह्या वेळार मुख्यमंत्री डॉ. प्रमोद सावंत, केंद्रीय राज्यमंत्री श्रीपाद नायक, खासदार सदानंद शेट तानावडे, पंचायत मंत्री मॉवीन गुदिन्हो, वीज मंत्री सुदिन ढवळीकार, मंत्री सुभाष फळदेसाय, आमदार दाजी साळकार, आमदार दिगंबर कामत, आमदार आंतोनियो वास, आमदार वीरेश बोरकर, रेजिनाल्ड लॉरेन्स, सभापती रमेश तवडकार, नगराध्यक्ष गिरीश बोरकार हाजीर आशिल्ले.
आतां गोंयांतल्या म्हामार्गांचें उदरगतीचें काम पुराय जावपाचे वाटेर आसा. गोंयांत रस्ते आनी मुळाव्या साधनसुविधांचें चित्र आतां बदलता. रस्ते रुंद जाल्ल्यान आनी बरे रस्ते आशिल्ल्यान वेळ आनी इंधनाची बचत जावपाक लागल्या. गोंयच्या हिताचे प्रकल्प हातांत घेतल्यात. रस्त्यांक लागून अपघात जावचे नात आनी येरादारीचे कोंयडेचो प्रस्न सुटावो जातलो, अशें मंत्री गडकरी हांणी सांगलें.
मुंबय-गोंय म्हामार्गाचेर खूब अडचणी आयल्यो. ते पुराय जाल्ल्यान तीन ते चार म्हयन्यांनी हायवे उक्तो जातलो. ताका लागून 5 ते 6 वरांनी गोंय-मुंबय प्रवास शक्य जातलो. नव्या जुवारी पुलाचेर ऑब्झर्व्हेटरी टॉवर्स आनी व्ह्युवींग गॅलरी हो म्हज्या सपनांतलो प्रकल्प. ह्या प्रकल्पाक लागून गोंय सरकाराक एकूय पयसो खर्च करचो पडचो ना. प्रकल्प पळोवपा खातीर गोंयांत येवपी पर्यटकांचो आंकडो वाडटलो. प्रकल्प आंतरराष्ट्रीय दर्ज्याचो आसतलो. ताचे सारको आनीक खंयचोच प्रकल्प हेर खंयच दिसचो ना, अशेंय गडकरी हांणी स्पश्ट केलें.
गोंयांत उदका टॅक्सीचो विचार करप गरजेचें आसा. जाका लागून येरादारीचो प्रस्न फकत सुटावो जावन येणावळ वाडटली. पर्यावरणाचो विचार करून चड झाडां लावपाक जाय. पूण पर्यावरणा वांगडाच उदरगतीचीय गरज आसा असो विचार करचो, अशें गडकरी हांणी सांगलें. नितीन गडकरी हांचो आदार आनी मजत गोंयकार विसरचे नात. उदरगती खातीर जें जाय तें गडकरी हांणी दिलां. ह्या प्रकल्पाक लागून पर्यटक वाडटले, अशें केंद्रीय मंत्री श्रीपाद नायक हांणी सांगलें.
प्रकल्पांत थळाव्यांक प्राधान्य : मुख्यमंत्री
केंद्रीय मंत्री नितीन गडकरी विदेशांत प्रवास करतना सदांच नव्यो नव्यो गजाली पळयतात. ते उपरांत ताचे परस बरी गजाल भारतांत जावची, हे खातीर ते यत्न करतात आनी नवे संकल्पने खातीर ते गोंयाक प्राधान्य दितात. गडकरी हांकां लागून गोंयांत 33 हजार कोटींचीं कामां जाल्यांत. ट्वीन टॉवर्स प्रकल्पाक लागून अर्थवेवस्थेक उर्जा मेळटली, रोजगार वाडटलो. ह्या प्रकल्पांत थळाव्यांक प्राधान्य दितले, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
