भांगरभूंय | प्रतिनिधी
पेडणेंः गोंयांतल्यान महाराष्ट्रांत जावपी बेकायदो सोरो व्हरप्यांचेर खर कारवाय करपाची शिटकावणी महाराष्ट्र सरकारान दिल्ली आसतना लाखांनी रुपयांचो बेकायदो सोरो गोंयांतल्यान महाराष्ट्रांत व्हरपाच्यो घडणूक घडत आसात. पेडणें अबकारी विभागान वाहना सयत 28 लाखांचो बेकायदो सोरो जप्त केला.
मेळिल्ले म्हायती प्रमाण पणजेंच्यान महाराष्ट्रांत वचपी डीडी01 एच 9228 हो टेम्पो अबकारी अधिकाऱ्यांनी पत्रादेवी चेक नाक्यार आडायलो. ताची तपासणी केली तेन्ना तातूंत 28 लाखांचो बेकायदो सोरो मेळ्ळो. ते उपरांत अबकारी अधिकाऱ्यांनी टेम्पो सयत वाहन चालकाक ताब्यांत घेतल्या.
जप्त केल्ल्या सोऱ्यांत ब्ल्यू रॉयल हो हलक्या प्रतिच्या सोऱ्याची 635 बॉक्सां मेळ्ळी. वाहना सयत सोऱ्याचें मोल 28 लाख 53 हजार जाता. ही कारवाय अबकारी विभागाचे अधिकारी निरिक्षक विभूती शेटये हांच्या मार्गदर्शना खाला जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
