भांगरभूंय | प्रतिनिधी
मुख्यमंत्री डॉ. प्रमोद सावंत: दिवचल पत्रकार कार्यालयाचें उक्तावण
दिवचल: समाजीक तशेंच राजकीय रचणुकेंत गांवगिर्या पत्रकारांचें व्हड योगदान आसा. समाजीक जागृताय दवरून परिवर्तनकारी समाजीक उदरगत निर्माण करपाक तांणी सतत योगदान दिवपाक जाय. गांवगिर्या पत्रकारांक विवीध येवजण्यांचो लाव मेळपा खातीर सरकारान खूबशे नवे बदल घडोवन हाडल्यात. नवे लेखक निर्माण करपा खातीर सतत यत्न करचे, अशें मुख्यमंत्री डॉ. प्रमोद सावंत हांणी सांगलें.
दिवचल पत्रकार संघाच्या नव्या कार्यालयाच्या उक्तावणा वेळार ते उलयताले. ह्या वेळार माचयेर आमदार डॉ. चंद्रकांत शेट्ये, आमदार प्रेमेंद्र शेट, आदले सभापती राजेश पाटणेंकार, नगराध्यक्ष कुंदन फळारी, दिवचल पत्रकार संघाचे अध्यक्ष रविराज च्यारी हाजीर आशिल्ले.
स्वभाशा, संस्कृती तिगोवपा खातीर दिवचल म्हालांतले पत्रकार सदांचे मुखार आसतात. दिवचलचें गिरेस्त संस्कृतीक दायज तशेंच पुर्तुगेज काळांत क्रिस्तांवपण आडावपा खातीर हे भूंयच्या लोकांनी खूब योगदान दिल्ल्याची हमी मुख्यमंत्र्यान दिली.
पत्रकारांक पुराय संरक्षण दिवपा खातीर कायदो केला आनी तांकां कोणूच हात लावचो ना अशीय तरतूद कायद्यांत आसा अशें डॉ. सावंत हांणी सांगलें.
आमकां एक निश्चीत दिका दाखोवपा खातीर गांवगिर्या वाठारांतले पत्रकार एक म्हत्वाचो दुवो अशें प्रेमेंद्र शेट हांणी सांगलें.
आमदार चंद्रकांत शेट्ये हांणी, गांवगिर्या वाठारांतल्या पत्रकारांक आपल्या फुडाराची चिंता सतायता. सरकारान तांकां निवृत्ती उपरांत पुरायेन संरक्षण आनी हमी दिवची. तशेंच अर्थीक नियोजन करचें अशी मागणी केली.
दिवचल पत्रकार संघ संघटीत जावन समाजांतल्यो वेगवेगळ्यो समस्या सोडोवपा वांगडाच समाजीक जागृतायेचें काम तांणी केलां अशें राजेश पाटणेंकार हांणी सांगलें.
कुंदन फळारी हांणी परबीं भेटयलीं.
ह्या वेळार औदुंबर च्यारी, जेश्ठ पत्रकार रामनाथ देसाय, रमेश सावयकार हांचो भोवमान मुख्यमंत्र्या हस्तुकीं जालो.
तशेंच विशांत वझे हांचोय तांच्या योगदाना विशीं भोवमान केलो.
मुख्यमंत्र्यां हस्तुकीं कार्यालयाचें उक्तावण जालें. रविराज च्यारी हांणी येवकार दिलो. सुत्रसंचालन दुर्गादास गर्दे हांणी केलें.
ह्या वेळार जेश्ठ पत्रकार सुरेश वाळवे, डॉ. शेखर साळकार, कांता पाटणेंकार, वल्लभ साळकार हांचे वांगडा विवीध मळावेले मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
