भांगरभूंय | प्रतिनिधी
फुडले चार दीस घोग्यांनी पावसाची शक्यताय
भांगरभूंय I प्रतिनिधी
पणजी : हवामान विभागान उक्तायिल्ल्या अदमासा प्रमाण बुधवारा सांजे राज्यांत कांय वाठारांनी घोग्यांनी पावस पडलो. राजधानी पणजे तीन वरांत 3.09 इंच (78.5 मिमि.) पावसाची नोंद जाल्या. बुधवारा राज्यांत कांय वाठारांनी विजांच्या गडगडाटा सयत पावस पडलो. बिरेस्तारा दक्षीण आनी उत्तर गोंयांत पावस पडटलो. जाल्यार शेनवार, आयतार आनी सोमारा कांय वाठारांनी मध्यम ते घोग्यांनी पावसाची शक्यताय आसा, अशें राज्य हवामान विभागान कळीत केलां.
कर्नाटकाच्या दक्षीण मध्य दर्या वयल्यान चक्रीवादळ मध्य कर्नाटक आनी शेजारच्या दर्याच्या पातळे पसून सुमार देड किमि. मेरेन वाडलां. तशेंच बंगालाच्या उपदर्यांत पूर्वमध्य आनी लागसारच्या आग्नेय वाठारांत चक्रीवादळ आसा. ते दर्या सपाटी पसून सरासरी 5.8 किमि. मेरेन पातळ्ळां. ह्याच प्रभावा खाला फुडल्या कांय वरांत अस्तंत मध्य बंगालच्या उपदर्यांत उण्या दाबाचो पट्टो तयार जावपाची शक्यताय आसा. ताका लागून राज्यांत उटंगाराचो पावस पडुये, असो अदमास हवामान विभागाचे तज्ञ राजश्री व्हीपीएम हांणी उक्तायला.
मजगतीं, राज्यांत आतां मेरेन 94.80 इंच पावसाची नोंद जाल्या. फाटल्या वर्साचे तुळेंत आतां मेरेन 13.6 टक्के पावसाचो उणाव आसा.
मजगतीं, बुधवारा दिवचल म्हालांत दनपारां उपरांत घोग्यांनी पावस पडलो. ते खातीर लोकजीण विस्कळीत जाली. चवथीचे सात दीस पावसान विसव घेतले परतून सुरवात केल्या. फुडले चार दीस पावसाचो नेट कायम उरतलो, अशें हवामान विभागान म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
