भांगरभूंय | प्रतिनिधी
पणजी : कोंकणी कवितेचे शिल्पकार, साहित्य अकादेमी जैतिवंत नामनेचे कवी डॉ. मनोहरराय सरदेसाय हांच्या साहित्यीक जिणेचेर आधारिल्ल्याा खास म्हायतीपटाचें प्रकाशन 1 ऑक्टोबराक पणजे जातलें. गोवा कोंकणी अकादेमी आनी विकासिनी मंडळ हांच्या जोड पालवान आयोजीत केल्ली ही खासा कार्यावळ पाटो, पणजे हांगा गोवा कोंकणी अकादेमीच्या शणै गोंयबाब सभाघरांत सांजेच्या 4 वरांचेर जातली.
साहित्यिका आनी सिनेकर्मी ज्योती कुंकळकार हांणी ह्या विशेश म्हायतीपटाची निर्मिती केल्या. शिक्षणतज्ञ भास्कर नायक हे म्हायतीपट प्रकाशन सुवाळ्याचे मुखेल सोयरे आसतले. पुराभिलेख अधिकारी डॉ. बालाजी शणै हे खास आमंत्रीत म्हणून जाल्यार गोवा कोंकणी अकादेमीचे प्रभारी अध्यक्ष वसंत सावंत कार्यावळीक अध्यक्ष आसतले.
‘मनोहरराय सरदेसाय हे कोंकणी तशेंच भारतीय साहित्यातलें सामकें म्हत्वाचें नांव आसा. कोंकणी कवितेक तांणी नवो आयाम दिलो. तांचे खातीर कोंकणी कविता गांवगिरो वाठार ते देशभरांत पावली, अशा व्यक्तिमत्वाचें व्हडपण आनी म्हायती नवे पिळगेक कळची देखून ह्या विशेश म्हायतीपटाची निर्मिती केल्या.
ज्योती कुंकळकार हांणी आयजवेर ज्ञानपीठ जैतिवंत ज्येश्ठ साहित्यीक रवीन्द्रबाब केळेकार आनी दामोदर मावजो तशेंच लेखक चंद्रकांत केणी आनी आतां मनोहरराय सरदेसाय हांचेर म्हायतीपटाची निर्मिती करून कोंकणीच्या मळार व्हड योगदान दिलां. तांणी वेगळ्यावेगळ्या विशयांचेर लघुपट, म्हायतीपट, जायरातपट आनी सिनेमाची निर्मिती केल्या. तेचप्रमाण तांकां राष्ट्रीय आणि राज्य पुरस्कार फावो जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
