भांगरभूंय | प्रतिनिधी
नगर पथ विक्रेते समिती कडेनूय जायना बसका
पणजी: पणजी म्हापालिकेक नगर पथ विक्रेते समितीची बसका घेवन पणजेंतल्या गाडेकारांचो प्रस्न सोडोवपाक अजून म्हूर्त मेळना. कोरोना पयलीं पणजेंतले भेलपुरी, पावभाजी, रस ऑम्लेट तशेंच हेर विवीध गाडे काडिल्ले. पणजी म्हापालिकेच्या मार्केट समितीची नगर पथ विक्रेते समिती कडेन बसका घेवन ह्या गाडेकारांक कायदेशीर सुवात दितले अशें थारायिल्लें. पूण अजून हे समितीची बसका जावंक नाशिल्ल्यान गाडेकारांक कायदेशीर सुवात मेळिल्ली ना.
पणजी म्हापालिके खाला पयलीं खूबशे गाडे चलताले. हे गाडेकार वेवस्थीत कर दिनात, तशेंच खूबशे गाडेकार दुसऱ्यांक गाडे चलोवपाक दितात, तांचेर फलक ना, तशेंच रातच्या वेळार गाडे थंय सावन व्हरिनात. सगली कडेन घाणीचें साम्राज्य पातळायतात अशीं खूबशीं कारणां दिवन हे गाडे बंद केल्ले.
कोरोना काळांत दोन वर्सां हे गाडे बंद केल्ले. नगर पथ विक्रेते समितीची बसका जाले उपरांत गाडेकारांक कायदेशीर सुवात दितले अशें म्हापालिकेच्या मार्केट समिती वतीन सांगिल्लें. पूण अजून नगर पथ विक्रेते समितीची एकूय बसका जाल्ली ना.
पणजेंत अजुनूय चलतात गाडे
सद्या पणजेंत कांय सुवातींनी भेलपुरीचे आनी हेर गाडे म्हापालिकेच्या कायदेशीर परवानगे बगर चलतात. हातूंतल्यान म्हापालिकेक कसलोच कर मेळना. ह्या गाडेकारांक कायदेशीर सुवात दिवपाची मागणी केल्या. पूण अजून नगर पथ विक्रेते समितीची बसका जायनाशिल्ल्यान कायदेशीर सुवात मेळिल्ली ना.
रोखडीच नगर पथ विक्रेते समितीची बसका आपयतले. हे खातीर आमी सगल्या वांगड्यांक सांगलां. जे गाडे सुरू आशिल्ले ते गाडेकार कोरोनाक लागून बेरोजगार जाल्ले. आतां रोखडीच बसका जाले उपरांत ह्या सगल्या गाडेकारांक सुवात थारावन दितले. तशेंच सगल्यो कायदेशीर गजाली पुराय करच्यो पडटल्यो. एके सुवातेर पांच-पांच गाडेकारांक परवानगी दितले अशी म्हायती पणजी म्हापालिकेचे मार्केट समिनीचे अध्यक्ष बेंटो लॉरेन्स हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
