भांगरभूंय | प्रतिनिधी
आयज म्हापालिकेंत जातली बसका
पणजी: पणजी म्हापालिकेच्या पोरण्या इमारतीचो एक भाग ह्या सप्तकांत मोडून उडोवपाची शक्यताय आसा. हे विशीं आयज (बुधवारा) म्हापालिकेची बसका जावपाची आसा. हे बसकेक म्हापौर, उपम्हापौर, नगरसेवक आनी अधिकारी हाजीर रावपाचे आसात.
पणजी म्हापालिकेचो राजधानी हॉटेला वटेन आशिल्लो एक भाग मोडून उडोवपाची शक्यताय आसा. हाचे पयलीं जानेवारी म्हयन्यांत आदले नगर विकास मंत्री मिलिंद नायक हांचे हस्तुकीं फेझ वन एक भागाचे भूंयपुजन केल्लें. वट्ट 11 कोटींची ही इमारत आसून हातूंत चार माळे आसतले. पयल्या माळ्यार दुकानां आसतलीं, आनी वयल्या तिनूय माळ्यांचेर म्हापालिकेच्यो कचेऱ्यो आसतल्यो.
हाचे पयलीं आदले म्हापौर सुरेंद्र फुर्ताद हांणी 70 कोटींच्या नव्या म्हापालिकेचो प्रस्ताव मांडिल्लो. पूण ह्या प्रकल्पाक मंजुरी मेळूंक नाशिल्ली. आतां 11 कोटींच्या इमारतीक मंजुरी मेळ्ळ्या. हाका लागून ही पोरणी इमारत टप्प्या टप्प्यान रोखडीच मोडटले. पणजी म्हापालिकेची पोरणी जाल्ली इमारत मोडून नवी इमारत बांदपाच्या प्रस्तावाक मंजुरी मेळ्ळ्या. आधुनीक सोयी आनी भव्य अशी ही इमारत आसतली. ह्या इमारतीचो आरोखडो लेगीत पत्रकारां मुखार सादर केल्लो.
इमारतीचो एक भाग मोडटले. पूण अजून ह्या विशयाचेर कायदेशीर म्हायती मेळिल्ली ना. आयज (बुधवारा) म्हापालिकेची परिशद बसका जावपाची आसा. ह्या वेळार इमारतीच्या बांदकामा विशीं निश्चीत म्हायती मेळटली. राजधानी हॉटेला वटेनचो आशिल्लो भाग मोडून उडोवपाची शक्यताय आसा अशें उपम्हापौर संजीव नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
