भांगरभूंय | प्रतिनिधी
बसकेंत पंचायत मंडळान थळाव्यांक दिलो तेंको
फोंडें: भोम वाठारांत लोकांच्या विरोधाक लागून पणजी ते मोले मेरेनच्या चौपदरी राष्ट्रीय महामार्गाचें काम आडखळून उरिल्लें. पूण सरकारान परत लोकवस्तेंतल्यान रस्त्याचें काम करपाची तयारी दाखयल्ल्यान थळावे विरोध करतात. आयतारा सांजवेळार जाल्ले बसकेंत थळाव्या पंचायत मंडळान थळाव्यांक पुराय तेंको दिला. मुख्यमंत्री डॉ. प्रमोद सावंत हांणी विशयाचेर खरपणान लक्ष दिवचें अशी मागणी गांवचे लोक करतात.
हे बसकेक थळावे सरपंच दामोदर नायक, पंच सुनील भोमकार, आदले पंच विश्वजीत नायक, संजय नायक आनी हेर थळावे हजर आशिल्ले.
पंच वांगडी सुनील भोमकार हांणी रस्तो चौपदरीकरण करपाचो प्रस्न फाटल्या कितल्याशाच वर्सां सावन आडखळून आसा. हे विशीं सरकारान निर्णय घेवपाची गरज आसा. सरकार निर्णय घेतना थळाव्यांक विस्वासांत घेवपाची गरज आशिल्ल्याचें तांणी सांगलें.
संजय नायक हांणी, 2010-11त थळाव्यांनी लोकवस्तींतल्यान येवपी रस्त्याच्या चौपदरीकरणाक विरोध केल्लो. तेन्ना विरोधी पक्षफुडारी तशेंच आदले मुख्यमंत्री मनोहर पर्रीकार हांणीय थळाव्यांक फाटबळ दिल्लें. पूण आतांच्या सरकारन परत हांगचे लोकवस्तींतल्यान रस्त्याचें चौपदरीकरण करपाचो यत्न सुरू केलो. थळावे आमदार तशेंच कला आनी संस्कृती मंत्री गोविंद गावडे हांणी थळाव्यांक फाटबळ दिवचें अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
