भांगरभूंय | प्रतिनिधी
मुख्यमंत्र्यांची कृशी अधिकाऱ्यां कडेन चर्चा
भांगरभूंय । प्रतिनिधी
पणजी: गोंयांत ओलसाणे खालची पडीक जमीन ताब्यांत घेवन ती हेर शेतकारांक कंत्राटी पद्दतीचेर कसपाक दिवपाचो विचार सरकारी पांवड्यार सुरू आसा. ते संदर्भांत काल (शुक्रारा) कृशी खात्या कडेन जाल्ले बसकेंत मुख्यमंत्री डॉ. प्रमोद सावंत हांणी अधिकाऱ्यां कडेन चर्चाय केल्या अशी म्हायती बसकेक हाजीर आशिल्ल्या एका ज्येश्ठ अधिकाऱ्यान ‘भांगरभूंय’ कडेन उलयतना दिली.
आत्मनिर्भर भारत-स्वयंपूर्ण गोंय मोहीम येसस्वी करपा खातीर कृशी मळाक घटाय दिवपाचो निर्णय मुख्यमंत्री डॉ. प्रमोद सावंत हांणी घेतला. ते नदरेन फाटल्या खूबशा वर्सां सावन पडीक आशिल्ले ओलसाणे खालची जमीन परतून लागवडी खाला हाडपाचो यत्न तांणी सुरू केला.
कायद्यांत दुरुस्ती करून अश्यो जमनी सरकाराच्या ताब्यांत घेवप आनी इत्सूक शेतकारांक त्यो कंत्राटी पद्दतीचेर कसपाक दिवपाचो विचार तांणी चलयला. हे विशीं तांणी शुक्रारा जाल्ले बसकेंत कृशी खात्याचे संचालक नेव्हील आल्फोन्सो आनी हेर वरिश्ठ अधिकाऱ्यां कडेन चर्चा केल्या. ताका लागून फुडल्या कांय दिसांत हे विशींचो प्रस्ताव कायदो खात्या कडेन वचून रोखडीच ताका मंजुरी मेळपाची शक्यताय आसा अशें ह्या अधिकाऱ्यान सांगलें.
मजगतीं, पडीक जमनी सरकार आपल्या ताब्यांत घेवन त्यो हेरांक कसपा खातीर दिवपाचो कायदो सरकार करतलें अशें संकेत हाचे पयलीं मंत्री सुभाष शिरोडकार हांंणी दिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
