पक्षी जाय दिगंतरा, नितळ दीस उत्पला

भांगरभूंय | प्रतिनिधी

भांगरभूंयेंतल्या ‘होमखणां’तल्यान चवथी दिसांनी ‘गणपतीदेवा, राखण दी गोंयकारा’ अशी होरावणी करतना गोंयांत राजकी बदलाचें वारें व्हांवता, असो अदमास उक्तायल्लो. चवथ आनी गोंयच्या राजकारणाचें लागसल्लें नातें. एकामेकांगेर चवथीचे नेवऱ्यो, मोदक खावपाक वतना सगलेच गांवच्या राजकारणाचो वास घेतात. शारांतल्यान आयिल्ले सोप्यार बसून खबरी मारतात. ताका जात, धर्म लागना तशेंच गोंयच्या फुडाऱ्यांचें.
गोंयांत हिंदू, क्रिस्तांव मुख्यमंत्री, आमदार एकामेकांगेर चवथ, दिवाळेक, नातलांक वतात. एका तेंपार खासदार फ्रान्सीस सार्दिन कुडटरेच्यान थेट तेन्नाच्या पाळी मतदारसंघांतल्या आमोणें पंचायतींत काँग्रेस कार्यकर्त्यांगेर चवथी दिसा भोंवडी करतालेच. भायर सरतना पोतीभर नेवऱ्यो आसताल्योच. सार्दिनबाब केन्नातरी शेतकीमंत्री, नुस्तेमारीमंत्री आसले. तांणीय शेतांत नुस्तें मेळपा खातीर येवजण चालीक लायिल्ली. राजकारणात हार- जैत पळयत गोंय विधानसभेंतल्यान दिल्लीचे संसदे मेरेन पावूनय ते केंद्रीय मंत्री जाले नात, पूण सभापतीपदाच्या कदेलार तांकां बसपाक मेळ्ळें. अकस्मात 1999 वर्सा वेगळ्याच राजकारणांतल्यान ताणीं नाल्ल फोडून अर्द नाल्लाच्या गोवा पीपल्स पार्टेची (जीपीपी) बुन्याद घाली. त्या नाल्लाक भाजपान आशिर्वाद दिलो, म्हयन्या उपरांत 2000 वर्सा भाजपाय रातयां सत्तेर आयली.
त्या सरकारांत आनी 1994 वर्साय भाजपाचे वाटचिरो (मायलस्टोन) आशिल्ले पयलींचे मुख्यमंत्री, आमदार दिगंबरबाब कामत म्हाळ म्हयन्यात परतून भाजपांत आयल्यात. पदवी मेरेन शिक्षणच न्हय जाल्यार राजकारणांतल्या अणभवांतल्यान तेय खूब शिकले. तांचो सभाव आक्रमक न्हय, मना काळजा सावन देवांक पांया पडूनच मतदारसंघा खातीर ते वावुरल्यात. म्हणूनच शर्मद रायतुरकार हांचे सारके वेंचणुकेंत तांचे आड देंवपी भाजपाचे वावुरपीय तांच्या आदाराक धांवल्यात.
दिगंबरबाबांक मुख्यमंत्रीपद मेळटलें अशो खबरो आसात. ताची आस तांकां आतां कित्याक आसतली? ताचे परस केंद्रीय मंत्रीपद तांकां कित्याक मेळचें न्हय? जे पिरायेचेर दिगंबरबाब घरा परत आयल्यात ती पिराय म्हत्त्वाची, भाजपाचो वाटचिरोच रावपाची संद ताणीं ना घेतल्यार अजापच. दिगंबरबाब आनी प्रधानमंत्री नरेंद्र मोदीजींची इश्टागत तशी घट आनी ते इश्टागतींतल्यान गोंयांक, भाजपक महासत्ते कडेन व्हरप तांचे सपन आसतलेंच.
भाजपच्या ह्या वाटचिऱ्यान मोपा विमानतळ जावचो म्हणूनय बुन्यादीचो वावर केलो. वावराच्या मार्केटिगांत फाटीं पडिल्ल्यान 2012, 2017, 2022 वर्साच्या वेंचणुकांनी काँग्रेसीचो पराजय जालो, फाटलीं धा वर्सां भाजपाचीच सत्ता आसा. कालचे, आयचे सत्ते परस फाल्यांच्या राजकारणाच्या अदमासांतल्यान दिगंबरबाब भाजपांत परतल्यात, हातूंत दुबाव नासचो. तांचे भाजपात परत येवप ‘पक्षी जाय दिगंतरा’ हे मराठी कवितेची याद करून दिता.
मडगांव स्मार्ट सिटी, कोयर वेवस्थापन आनी विकासाचीं सपनां तांचे कडेन आसात. केंद्रीय येवजणींतल्यान अस्तंत भारतांतली, गुजरातांवरी राज्यां अर्थकारणांत मुखार वचपाक लागल्यांत, विकासाचे अर्थकारण गोंयच्या वाटचिऱ्यांविना कशें जातलें? तंत्रगिन्यानांतय गोंयचे वाटचिरे आसात, ते वाटचिरेच उत्पलाक बरे दीस दाखयतले, नवो फुडार घडयतले हींच चिंतना हे फुडें आसचीं.
विलीनीकरण, पक्षांतरां, फुटीचें राजकारण अरस काँग्रेसींतल्यान सुरु जाल्लें. तातूंतल्यान “हीज लाॅर्डशीप प्लीज डिसक्वालिफाय ट्रेटर्स” अशी विनवणी आदले केंद्रीय कायदोमंत्री अॅड. रमाकांत खलप हांणी गोंय उच्च न्यायालयाच्या खंडपीठांत केल्ली. तातूंतल्यान अमृत मंथन घडलें तें अजून थांबना. त्या अमृत मंथनांतल्यान भाजपा घडली, फुडारांत भाजपांतय आत्मचिंतन जातलें, मंथन घडटलें.
गोंय मुक्तीचें पयलें दसक सोंपतना सुरू जाल्ले अस्थिरतायेंतल्यान गोंयकार विखुरले, पूण गोंयकारपण तिगून आसा. तें तिगोवपाची जापसालदारकी मठग्रामांतल्या वाटचिऱ्याक घेवची पडटलीच. विलीनीकरण, फूट, पक्षांतरांचो अभ्यास केल्यार उत्तर गोंयचें राजकारण बरेंच बदललां तर दक्षिणेचें राजकारण झुजांत शिरकलां. सार्दिनबाबां बरोबर आशिल्ले दयानंद नार्वेकार, लक्ष्मीकांत पार्सेकार, प्रतापसिंह राणे, मनोहर पर्रीकर, शशिकला काकोडकर, डाॅ. विल्फ्रेड डिसोझा आयज विधानसभेंत नात, पूण तांचें अस्तित्व आसा. खणी, नगर नियोजन खात्यावेल्यांन राजकी स्थित्यंतरां पळोवपी, घडोवपी, आपले वांगडा गोंयांक जैता कडेन व्हरपी वाटचिऱ्यांक हाचेफुडें सादूर रावन गोंयचें नांव म्हान करचेंच पडटलें.
काँग्रेसीतलें विरोधी पक्ष मुखेली सदांच विलीनीकरणात घुस्पले, शेतकाममंत्री रवी नायक म. गो., काँग्रेस, भाजपा, काँग्रेस, भाजपा अशी वाट चलत गेले तर शिंपणेमंत्री सुभाष शिरोडकार काँग्रेस, गोवा पीपल्स पार्टी, काँग्रेस, भाजपा मेरेन पावले. प्रवासी पक्षी म्हणून नामना जोडपी दिवचलचे पयलींचे आमदार पांडुरंग राऊत वेवसायांतल्यान वयर सरिल्ले. डाॅ. विल्फ्रेड डिसोझा हे अरस काँग्रेस, काँग्रेस, गोवा काँग्रेस, गोवा राजीव काँग्रेस, राष्ट्रवादी काँग्रेस, तृणमूल काँग्रेसींतल्यान काँग्रेसींत घुस्पत पक्षांतराचे बादशाह जावन उरले.
अमृत मंथनातल्यान राजकी पक्षाच्या विधिमंडळ गटाच्या वा दोन तृतियांश आमदारांच्या विलीनीकरणाक, सभापतीनीं दिल्ल्या निर्णयाक कायद्यान मान्यताय दिल्या. कायदो मानून घेता पूण गोंयच्या भौसांक तें मान्य आसा? काँग्रेस रान उठोवपाच्या मूडांत आसा? कित्याक खडेगांठ, पक्षाचे शिस्तबद्द शिपाय म्हणपी आमदार आलेक्स सिकेरा काँग्रेस सोडून गेल्यात ताचेर भासाभास जायत? कोण आसात भासाभाशेक तयार? अॅड. यतिश नायक, काँग्रेसीच्यो आदल्या प्रदेशाध्यक्ष निर्मला सावंत, आदले प्रदेशाध्यक्ष गिरीश चोडणकार? सत्तरीचे खाशे? लुईझिन फालेरो, मावीन गुदिन्हो, चर्चिल आलेमांव हांच्या पक्षांतरांच्यो काणयो वेगळ्योच आनी प्रोग्रेसिव्ह डेव्हेलाॅपमेंट फ्रंट (पीडीएफ) आघाडीय वेगळीच. युगोडेपा, सेव्ह गोवा ते राष्ट्रवादी काँग्रेस मेरेन तांचे भोंवडेक कितें म्हणप? सत्तरींच्या खाश्यांचें घराणे गोंय मुक्तीच्या झुजांतलें. तांचे कडेन आयजय आदर्शाचें दायज आसा, पूण घराब्याच्या राजकारणांत बाणावलेकार शेण्टात. यादींत आसा तें चर्चिल हांचें 14 दिसांचे मुख्यमंत्री म्हणून.
केन्ना चवथीचे उपरांत, केन्ना दिवाळेंत, केन्ना नव्या वर्सा, केन्ना प्रजासत्ताक दिसा गोंयांत हे वटेंतल्यान तेवटेन गेल्ल्या आमदारांनी इतिहास घडयला, सर्वोच्च न्यायालय ताची दखल घेता, तातूंत बदल घडत? राजकारण नितळ जावपाक क्रांती, क्रांतीकारी जाय, पूण क्रांतीची ज्योत पेटोवपाक पयसो, कायद्याचें शिक्षणय म्हत्त्वाचें. कायदेय बदलतात, एकल्याक एक- दुसऱ्याक दुसरो न्याय आसता पूण अखेरेक भोवमताक कौल मेळटा. न्यायालयांतूय भोवमताकच म्हत्त्व आसा. दीपक मिश्रा हांचेवरी न्यायमूर्ती आशिल्ले घटनापीठ महाराष्ट्राच्या राजकारणाचो अभ्यास करून न्याय दितना देसाच्या राजकारणाक नव्या मार्गार व्हरतलें? तत्वनिष्ठ भाजपा राजकारणाची ती एक परीक्षाच, भारत स्वातंत्र्याच्या भांगरा उत्सवांतली. राष्ट्रपिता महात्मा गांधीजींक नमन करून 100 टक्के नितळसाणीची मोख जातली? तरनाट्यांक जागयतली?

सुहासिनी प्रभुगांवकार
9881099260