भांगरभूंय | प्रतिनिधी
मुख्यमंत्रीः फर्मगुडये वयले जाहीर सभेचे पूर्वतयारेची पळोवणी
भांगरभूंय । प्रतिनिधी
फोंडें: फोंडें आनी सांखळी पालिका वेंचणुकेंत भाजपाचे उमेदवार भोवमतान निश्चीत जैतिवंत जातले. दरेके वेंचणुकेक गांभिर्यान पळयतात, अशें मुख्यमंत्री डॉ. प्रमोद सावंत हांणी सांगलें.
फर्मागुडयेर 16 एप्रीलाक जाहीर सभा जातली. ताचे पूर्वतयारेची पळोवणी शुक्रारा मुख्यमंत्री डॉ. सावंत हांणी केली. ह्या वेळार ते पत्रकारां कडेन उलयताले. केंद्रीय गृह मंत्री अमीत शाह हे जाहीर सभेक हाजीर रावतले. लोकसभा उमेदवारांक जिखून हाडचे खातीर हे जाहीर सभेचें आयोजन केलां.
पूर्वतयारेचे पळोवणे वेळार मुख्यमंत्र्यां वांगडा खेळां मंत्री गोविंद गावडे, भाजपा प्रदेशाध्यक्ष सदानंद तानावडे, भाजपाचे संजीव देसाय, आदले खासदार नरेंद्र सावयकार, आदले आमदार सिद्धार्थ कुंकळ्येंकार, दामू नायक, फोंडें भाजपा मंडळाचे अध्यक्ष विश्वनाथ दऴवी आनी हेर अधिकारी हाजीर आशिल्ले. लोकसभा वेंचकुणेचे पूर्व तयारेक पक्षा वतीन नेट दिला. दक्षीण गोंयची सुवात परतून मेळोवचे खातीर यत्न चल्ल्यात. जाहीर सभेंत सुमार 25 हजार लोक हाजीर रावतले. देशांत डबल इंजीन सरकार वावर करता. फाटले खेपे खुबूच उण्या फरकान हारिल्ल्या मतदारसंघांत पक्षा वतीन अदीक म्हत्व दितात. देशांतल्या 150 मतदारसंघांत उण्या मतांनी हार घेवची पडिल्ली. फुडल्या वर्सा जावपी लोकसभा वेंचणुकेंत अदीक मतांनी उमेदवारांक जिखून हाडपाचें ध्येय बाळगिलां, अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
