पक्षांतर आनी भारत जोडो यात्रा हे वेगळे विशय: राहूल

भांगरभूंय | प्रतिनिधी

मायकल लोबो, मुख्यमंत्री हांचे टिकेक दिली खडेगांठ जाप

पणजी : काँग्रेसीची भारत जोडो यात्रा सुरू आसतना गोंयांतल्यान काँग्रेस छोडो यात्रा सुरू जाता, ह्या मायकल लोबोचे टिकेक राहूल गांधी हांणी खडेगांठ जाप दिल्या. आमदारांचें पक्षांतर आनी भारत जोडो यात्रा हे वेगळेवेगळे विशय आसात. आमदारांनी केल्ल्या पक्षांतराचो भारत जोडो यात्रे कडेन संबंध ना अशें काँग्रेसीचे फुडारी आनी खासदार राहूल गांधी हांणी म्हणलां.

काँग्रेसीच्या आठ आमदारांनी भाजपांत प्रवेश करपाचे घडणुकेक एक सप्तक जावन गेलें. सप्तका उपरांत राहूल गांधी हांणी ही जाप दिल्या. लोकशायेच्यो ज्यो संस्था आसात, त्यो नश्ट करपाचें भाजप हें यंत्र आसा. ह्या यंत्रा आड काँग्रेसीचो लडो आसा. काँग्रेसीचो लडो हो लोकशाय वाटावपा खातीर आसा अशें राहूल गांधी हांणी स्पश्ट केलें.

राहूल गांधी हांच्या फुडारपणा खाला काँग्रेसीची भारत जोडो यात्रा सुरू आसा. कन्याकुमारी ते कश्मीर अशी ही यात्रा आसा. हे यात्रे निमतान राहूल गांधी तशेंच काँग्रेसीचे फुडारी हे लोकांच्यो भेटी घेत आसात. तांचे यात्रेक लोकां कडल्यान समाधानकारक प्रतिसाद मेळटा. ही यात्रा सुरू जाली तेन्नाच काँग्रेसीच्या आठ आमदारांनी भाजपांत प्रवेश केलो. फाटल्या बुधवारा 14 सप्टेंबराक हो प्रवेश जालो. दिगंबर कामत, मायकल लोबो, डिलायला लोबो, केदार नायक, राजेश फळदेसाय, संकल्प आमोणकार, अालेक्स सिक्वेरा आनी रुडाेल्फ फर्नांडीस हांणी भाजपांत प्रवेश केलो.

गोंयांतल्यान काँग्रेस छोडो यात्रा सुरू जाता. प्रधानमंत्री नरेंद्र मोदी हांचे हात घटमूट करपा खातीर काँग्रेस छोडो यात्रा सुरू जाता अशें मायकल लोबो हांणी विधान भवना भायर उलोवप केल्लें. मायकल लोबो हांच्या उलोवपा उपरांत मुख्यमंत्री डॉ. प्रमोद सावंत हांणी काँग्रेसीचेर टिका केल्ली.

काँग्रेसीचे खूबशे आमदार राष्ट्रहीत तशेंच प्रधानमंत्री नरेंद्र मोदी हांचे हात घटमूट करपा खातीर भाजपांत येत आसात. ताका लागून येता ते लोकसभा वेंचणुकेंत भाजप 400 परस चड सुवाती मेळयतलो आनी केंद्रांत परतून एकदां प्रधानमंत्री नरेंद्र मोदी हांच्या फुडारपणा खाला भाजपा सरकार सत्तेर येतली अशेंय मुख्यमंत्र्यान म्हणिल्लें. गोंयांतल्यान ही प्रक्रिया सुरू जाल्या. देशाच्या हेर वाठारांनीय ही प्रक्रिया जातली अशेंय मुख्यमंत्री डॉ. प्रमोद सावंत हांणी म्हणिल्लें.

काँग्रेसीच्या केंद्रीय फुडाऱ्यांनी हाचेर उलाेवप करूंक नाशिल्लें. राहूल गांधी हांकां पत्रकार परिशदेंत हे विशीं प्रस्न केलो तेन्ना राहूल गांधी हांणी वयली जाप दिली. लोकशायेच्यो संस्था नश्ट जावपाक लागल्यात. लोकशाय वाटावपाचे काँग्रेसीचे यत्न आसात. सगले लोक एकठांय येवपाची गरज आसा. लोकां मदीं एकचार उरलो जाल्यार देशाची उदरगत जातली. देश फुडें पावतलो. हो संदेश दिवपा खातीर भारत जोडो यात्रा काँग्रेसीन सुरू केल्या, अशें राहूल गांधी हांणी भाजपाच्या आरोपाक जाप दितना म्हणलें.

लोकांचेर चेपण हाडून, धमक्यो दिवप, पयशांचो सुमारा भायर वापर करून आनी भारतीय संविधानाचे फास्के भायर वचून राजकारण करीत आशिल्ल्या भाजपा आड काँग्रेसीचो लडो सुरू आशिल्ल्याचें फाटल्या खूबशा वर्सां सावन हांव सांगत आसा. ताचेंच दर्शन हालींच गोंयांतल्या आठ आमदारांच्या भाजप प्रवेशांतल्यान दिसून आयलां अशेंय राहूल गांधी हांणी म्हणलें.

गोंयांत भाजपांत प्रवेश केल्ल्या 8 आमदारांचेर टिका सुरू आसा. आमदार आलेक्स सिक्वेरा हांच्या घरा भायर निदर्शनां जावन तांचो बावटो लासलो.

काँग्रेसीची ‘भारत जोड’ यात्रा आनी गोंयांत काँग्रेसीचे आमदार फुटप ह्यो दोन वेगळ्यो गजाली आसात. तरी लेगीत गोंयचे मुख्यमंत्री डॉ. प्रमोद सावंत हाचे वयल्यान काँग्रेसीचेर टिका करीत आसत जाल्यार तांकां उलोवपाचो अधिकार आसा.

राहूल गांधी, काँग्रेस फुडारी