भांगरभूंय | प्रतिनिधी
47 पंचायतींनी भोवसंख्य बायलां पंच
भांगरभूंय I प्रतिनिधी
पणजी : प्रभाग राखीव आसतना लेगीत पंचायत वेंचणुकेंत बऱ्याच प्रभागांनी सर्वसामान्य गटांत बायलांनी आघाडी घेतल्या. हाका लागून पंचायतींनी बायलां पंचांचें प्रमाण वाडलां. 1,528 प्रभागांतल्यान 665 प्रभागांनी पंच म्हूण बायलां उमेदवार वेंचून आयल्यात. हें प्रमाण 44 टक्के जाता. तशेंच 47 पंचायतींनी बायलां पंचांचो आंकडो दादल्यां परस चड आसा.
हाका लागून सरपंचपद राखीव नाशिल्या पंचायतींनी लेगीत सरपंचपद बायलांक मेळप शक्य आसा. वाडी – तळावली, कवळें (फोंडें म्हाल), खोतोडें, ठाणें – दोंगुर्ली, मोर्लें (सत्तरी म्हाल), असोल्डें, शेल्डें, फातर्पा (केपें म्हाल) ह्या पंचायतींनी बायलां पंचांचो आंकडो दादल्यां परस चड आसा.
सांगें म्हालांत रिवण, उगें, साश्ट म्हालांत बेतालभाटी, बाणावली, चांदर, कोलवा, धर्मापूर शिर्ली, माकाझन, माजोड्डें, ओर्ली, पारोडें, राशोल, राय, सां जुझे दी आरीयल, सुरावली हांगा बायलां पंचांचो आंकडो चड आसा. खोतीगांव, गांवडोंगरी (काणकोण म्हाल), तोरशें (पेडणें म्हाल), भाटी, कुडका बांबोळी, सांताक्रुज, सांत इस्तेव (तिसवाडी म्हाल), बस्तोडें, कामुर्ली, कोलवाळ, नानोडें, ओशेल, रेयश मागूश, शिवोली, सुकूर, थिवी, उसकय (बार्देस म्हाल) , कुठ्ठाळी, कांसावली, चिखली ( मुरगांव म्हाल), वेळगें, कारापूर, साळ आनी मयें (दिवचल म्हाल) ह्या पंचायतींनी दादल्यां परस बायलां उमेदवार जैतिवंत जावपी आंकडो चड
आसा.
धारबांदोडें म्हालात सगल्या पंचायतींनी बायलां परस दादले वेंचून येवपाचो आंकडो चड आसा. पेडणें म्हालांत फक्त तोरशें पंचायतींत बायलां पंचांचो आंकडो चड आसा. साश्ट आनी बार्देस म्हालांत सगल्यांत चड पंचायती आसा. ह्या दोनूय म्हालांनी बायलां पंचांचो आंकडो चड आसपी पंचायती लेगीत चड आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
