भांगरभूंय | प्रतिनिधी
दनपार मेरेन चित्र जातलें स्पश्ट, सरपंचपदाचीं समिकरणां मांडप सुरू
भांगरभूंय I प्रतिनिधी
पणजी : पंचायतींच्या आयज जावपी मतमेजणेक लागून उमेदवार तशेंच तांच्या समर्थकां मदीं उमेदीचें वातावरण आसा. कितलीं मतां पडटलीं आनी कितल्या मतांनी जैत मेळटलें, हाचीं समिकरणां उमेदवार मांडटात. बिनविरोध वेंचून आयिल्ले तशेंच जैता विशीं आत्मविस्वास आशिल्ल्या उमेदवारांनी सरपंचपदाचीं समिकरणां मांडपाक सुरवात केल्या.
राज्यांतल्या 186 पंचायतीं खातीर बुधवारा मतदान जालें. खोब्रावाडो – कळंगुटचो प्रभाग 9 वगळ्ळ्यार हेर सगल्या प्रभागांनी शांतिकायेन मतदान जालें. दोन उमेदवारांच्या वेंचणूक चिन्नां मदीं घोळ जाल्ल्यान खोब्रावाडो – कळंगूटे प्रभाग 9त दुसरे दिसा बिरेस्तारा मतदान जालें. बुधवारचें मतदान आयोगान स्थगीत दवरिल्लें. खोब्रावाड्यार 950 मतदारांतल्यान 755 जाणांनी मतदान केलें. 79.47 टक्के मतदान जालें.
पुराय राज्यांत 78.70 टक्के मतदान जालें. पावसाचें प्रमाण उणें आशिल्ले. तरी लेगीत फाटल्या पंचायत वेंचणुके परस हें वेंचणुकेंत मात्शें उणें मतदान जालें. पंचायतींच्यो वेंचणुको पक्षीय पांवड्यार जायनात. तरी लेगीत मंत्री, आमदारांचे समर्थक तशेंच राजकी पक्षांचे कार्यकर्ते मोट्या संख्येन वेंचणुकेंत सक्रीय आशिल्ले. समर्थक उमेदवार वेंचून येवचे म्हूण मंत्री तशेंच आमदारांनी यत्न केल्यात.
म्हालाच्या थळांचेर मतमेजणी जातली. मतमेजणेची तयारी पुराय जाल्या. तिसवाडी म्हालांत 18 पंचायती आसात. ह्या 18 पंचायतींची मतमेजणी डॉ. श्यामाप्रसाद मुखर्जी स्टेडीयम, बांबोळे सकाळीं 8 वरांचेर सुरू जातली. सांताक्रुज, कुडका, मेरशी, चिंबल, शिरदोन पाळें, भाटी, गोवा वेल्हा, आगशी, नेवरा, आजोशी-मंडूर, करमळी, चोडण, पोरणें गोंय, गोलती नावेली, खोर्ली, सांव माथायस, सांंत इस्तेव आनी कुमारजुंवें ह्यो पंचायती तिसवाडी म्हालांत आसात.
सत्तरी म्हालांतल्या पंचायतींची मतमेजणी वाळपय कदंब बसस्थानक सभाघरांत जातली. पर्यें, मोर्लें, केरी, होंडा, म्हावशी, ठाणें, दोंगुर्ली, नगरगांव, सांवड्डें, खोतोडें, गुळेली, भिरोंडें आनी पिसुर्लें ह्यो पंचायती सत्तरी म्हालांत येतात.
बार्देस म्हालांत 21 पंचायती आसात. मतमेजणी म्हापश्यां पेडें खेळां संकुलांत जातली. पेडणें म्हालांतल्या 8 पंचायतींची मतमेजणी संत सोहिरोबानाथ आंबिये म्हाविद्यालयांत जातली. हेर 9 पंचायतींची मतमेजणी तुयां दीनदयाळ भवनांत जातली.
दिवचल म्हालांतल्या 17 पंचायतींची मतमेजणी नारायण झांटये म्हाविद्यालयांत जातली. साश्ट म्हालांतल्या 33 पंचायतींची मतमेजणी माथानी साल्ढाणा संकुल, मडगांवां जातली. फोंडें म्हालांतल्या पंचायतींची मतमेजणी आयटीआय, फर्मागुडयेर जातली. सांगें म्हालांतल्या पंचायतींची मतमेजणी खेळां संकूल सांग्यार जातली. काणकोण म्हालांतल्या पंचायतींची मतमेजणी काणकोण मामलेदार कचेरी सभाघरांत जातली. धारबांदोडेंतल्या पंचायतींची मतमेजणी सरकारी कार्यालय संकुल धारबांदोड्यां जातली.
केपें म्हालांतल्या 11 पंचायतींची मतमेजणी खेळां संकुल बोरीमळ हांगा जातली. जाल्यार मुरगांव म्हालांतल्या 7 पंचायतींची मतमेजणी रवींद्र भवन बायणा जातली.
कळंगूटे प्रभाग 9त 79.47 टक्के मतदान
म्हापशेंः कळंगूटे पंचायत प्रभाग 9त 79.47 टक्के मतदान जालें. 950 मतदारांतल्यान 755 जाणांनी मतदान केलें. हातूंत 375 दादले आनी 380 बायलांचो आस्पाव आसा. बुधवारा मतपत्रिकांत दोगां उमेदवारांच्या वेंचणूक चिन्नांच्या घोळाक लागून मतदान स्थगीत दवरचें पडिल्लें. त्या प्रभागांतले मतदान काल घेतलें. सकाळच्या सत्रांत मतदारांचो उणो प्रतिसाद अाशिल्लो. मात सांज वेळार मतदारांनी मोट्या प्रमाणांत मतदान केलें. बुधवारा ह्या प्रभागांतल्या मतपत्रिकांत दोगां उमेदवारांचीं वेंचणूक चिन्नां चुकीचे पद्दतीन छापिल्ली. वेंचणूक अायोगाच्या घाळपणाक लागून वेंचणूक एक दीस मुखार धुकलची पडिल्लीं. ह्या प्रकराक लागून मतदारांनी नाराजी उक्तायिल्ली. मजगतीं, ह्या म्हालांतल्या पंचायतींची मतमेजणी आयज (शुक्रार) पेडें म्हापश्यां खेळां संकुलांत जातली. मतमेजणे खातीर आयोगान नेटान तयारी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
