भांगरभूंय | प्रतिनिधी
भांगरभूंय । प्रतिनिधी
वाळपयः सत्तरी तालुक्यांत फाटल्या कांय दिसां सावन पडपी पावसाक लागून म्हादय आनी हेर न्हंयांतल्यान खोदूळ उदक येवपाक लागलां. ताचो परिणाम दाबोस हांगच्या उदक शुद्धिकरण प्रकल्पाचेर जाला. ताका लागून फाटल्या पांच दिसां सावन कांय वाठारांत पियेवपाचे उदका पुरवणेचेर जाला. वादळी वाऱ्याक लागून वीज पुरवण बंद पडटा ताचोर परिणाम हे पुरवणेचेर जाता.
फाटल्या कांय दिसां सावन सत्तरी तालुक्यांत व्हडा प्रमाणात पावस पडटा. घाटमाथ्याचेर पडपी पावसाक लागून म्हादय न्हंयेतल्या खोदूळ उदक येवपाक लागलां. हें उदक नितळ करपी दाबोस शुद्धिकरण प्रकल्पाचे यंत्रणेचेर ताण येता. जाय त्या प्रमाणात उदक नितळ जायना आनी ताची पुराय ताकींन पुरवण करप शक्य जायना अशें अधिकाऱ्यांनी सांगलें.
फाटल्या पांच दिसां सावन भिरोंडे पंचायत वाठारांत उदका पुरवण बंद पडिल्ल्यान लोकांक पियेवपाक उदक ना अशी परिस्थिती आसा. हो गांव उदक पुरवण नेटवर्काच्या निमण्या तोकार आशिल्ल्यान थंय उदकाचो दाब कमी आसता अशें अधिकाऱ्यांनी सांगलें. शेनवार मेरेन उदका पुरवण पयलीं भशेन जातली असें तांणी सांगलां. वीज पुरवण बंद पडल्यार रिकामी जाल्ली पायपलायन भरपा खातीर बरोच वेळ लागता आनी लोकांच्या नळाक उदक येना अशें तांणी सांगलें.
दोबोल उदक शुद्धिकरण प्रकल्पांत वीज पुरवण बंद पडल्यार पर्यायी वेवस्था म्हणून जनरेटर बसोवपाची मागणी अजून पुराय जायना. ताका लागून वीज पुरवण बंद पडल्यार पुराय प्रकल्प बंद पडटा. ही गजाल सरकारी यंत्रणेचे नदरेक हाडून लेगीत जनरेटर बसोवपा कडेन तांची आडनदर चल्ल्या. सत्तरी तालुक्याच्या 70 टक्के वाठाराक उदका पुरवण करपी दाबोस प्रकल्पांत जनरेटर ना ही खंत करपाची गजाल आसा अशें लोक सांगपाक लागल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
